കന്നഡ:- കെജിഎഫ് താരവും ശ്രദ്ധിക്കപ്പെട്ട ഹാസ്യനടനുമായ മോഹൻ ജുനേജ അന്തരിച്ചു. ഇന്ന്പു ലർച്ചെയായിരുന്നു അന്ത്യം. ഏറെ നാളായി അസുഖബാധിതനായിരുന്ന താരം ചികിത്സയോട് പ്രതികരിച്ചിരുന്നില്ല. ബംഗളൂരുവിലെ സ്വകാര്യ ആശുപത്രിയിൽ വെച്ചായിരുന്നു അന്ത്യം. പതിറ്റാണ്ടുകളായി സിനിമാ ഇൻഡസ്ട്രിയിൽ തിളങ്ങുന്ന മോഹൻ ജുനേജ നൂറിലധികം സിനിമകളിൽ അഭിനയിച്ചിട്ടുണ്ട്. മോഹൻ തൻ്റെ കരിയറിൽ തമിഴ്, തെലുങ്ക്, മലയാളം, ഹിന്ദി ഭാഷകളിലും ഹാസ്യനടൻ എന്ന നിലയിൽ അഭിനയിച്ചിട്ടുണ്ട്. സൂപ്പർഹിറ്റ് ചിത്രമായ കെജിഎഫ്: ചാപ്റ്റർ 2, കെജിഎഫ്: ചാപ്റ്റർ 1 എന്നീ രണ്ട് ഭാഗങ്ങളിലും മോഹൻ ജുനേജ അഭിനയിച്ചിട്ടുണ്ട്.കന്നഡ സിനിമാലോകത്തെ യുവനടൻ ഗണേഷിൻ്റെ കരിയറിൽ വലിയ ബ്രേക്ക് നൽകിയ ചെല്ലട്ടയിലെ അദ്ദേഹത്തിൻ്റെ വേഷം ഇപ്പോഴും പ്രേക്ഷകർ ഓർക്കുന്നതാണ്. നിരവധി പേരാണ് സോഷ്യൽ മീഡിയ പേജുകളിലൂടെ നടന് അനുശോചനം രേഖപ്പെടുത്തുന്നത്. അദ്ദേഹത്തിൻ്റെ മരണം ആരാധകരെയും സാൻഡൽ വുഡ് സിനിമാ മേഖലയെയും ഒന്നടങ്കം ഞെട്ടിച്ചിരിക്കുകയാണ്. വൻ വാണിജ്യവിജയം നേടിയ കന്നഡ ചിത്രം കെജിഎഫിൻ്റെ രണ്ടു ഭാഗങ്ങളിലും കഥ പറഞ്ഞ് തുടങ്ങിയ നടനാണ് മോഹൻ ജുനേജ. രാജ്യത്താകെ തരംഗമായ കെജിഎഫിലെ മോഹൻ ജുനേജയുടെ വേഷം ശ്രദ്ധേയമായിരുന്നു. ടിവി സീരിയലുകളിലും മോഹൻ ജുനേജ അഭിനയിച്ചിട്ടുണ്ട്. കർണാടകയിലെ തുംകുർ സ്വദേശിയാണ് മോഹൻ. താരം ബെംഗളൂരുവിലാണു പഠിച്ച് വളർന്നത്, ബെംഗലൂരുവിൽ തന്നെയാണ് നടൻ്റെ സ്ഥിര താമസവും. സംസ്കാര ചടങ്ങുകൾ ഇന്നു നടക്കുമെന്നാണ് റിപ്പോർട്ടുകൾ.