പ്യോംങ്യാംഗ്: കൊവിഡ് കേസുകൾ വർധിക്കുന്ന സാഹചര്യത്തിൽ പരമ്പരാഗത ചികിത്സാരീതികൾക്ക് മുൻഗണന നൽകി ഉത്തരകൊറിയ. കൊവിഡ് പ്രതിരോധ വാക്സിൻ വിതരണം നടത്താത്ത ഉത്തര കൊറിയയിൽ കൂടുതൽ പേരിലേക്ക് രോഗബാധ വ്യാപിക്കുകയാണ്. ഈ സാഹചര്യത്തിലാണ് ഹെർബൽ ടീ അടക്കമുള്ള പരമ്പരാഗത ചികിത്സാരീതികൾക്ക് കിം ജോങ് ഉൻ സർക്കാർ കൂടുതൽ പരിഗണന നൽകുന്നതെന്ന് ബിബിസി റിപ്പോർട്ട് ചെയ്തു. വിവിധ രാജ്യങ്ങളിൽ കൊവിഡ് കേസുകൾ പൊട്ടിപ്പുറപ്പെട്ടതോടെ 2020ൻ്റെ തുടക്കത്തിൽ തന്നെ അതിർത്തികളടച്ചാണ് ഉത്തര കൊറിയ കൊവിഡിനെ പ്രതിരോധിക്കാനുള്ള ആദ്യ നീക്കം ആരംഭിച്ചത്. കൊവിഡ് പ്രതിരോധ വാക്സിൻ വിതരണം ചെയ്യാൻ സർക്കാർ വിസമ്മതിക്കുകയും ചെയ്തു. അന്താരാഷ്ട്ര ഏജൻസികൾ വാക്സിൻ വഗ്ദാനം ചെയ്തെങ്കിലും സർക്കാർ അനുകൂല നിലപാടല്ല സ്വീകരിച്ചത്. കൊവിഡിനെ ഭയന്ന് രാജ്യത്തേക്കുള്ള ഇറക്കുമതിക്ക് പോലും നിയന്ത്രണം ഏർപ്പെടുത്തി. എന്നാൽ, ഈ വർഷം മെയ് മുതൽ രാജ്യത്ത് കൊവിഡ് കേസുകൾ റിപ്പോർട്ട് ചെയ്യപ്പെട്ടതോടെയാണ് പരമ്പരാഗത ചികിത്സകൾ ശുപാർശ ചെയ്യാൻ അധികൃതർ തീരുമാനിച്ചത്. കൊവിഡ് ഗുരുതരമായി ബാധിക്കാത്ത ആളുകൾ ചുക്ക് (ഉണക്കിയ ഇഞ്ചി) ചേർത്ത ചായ കുടിക്കണമെന്ന നിർദേശം അധികൃതർ നൽകിയതായി ഭരണകക്ഷി പത്രമായ റോഡോങ് സിൻമുൻ റിപ്പോർട്ട് ചെയ്തു. ഇഞ്ചി അല്ലെങ്കിൽ ഹണിസക്കിൾ ചായയും വില്ലോ ഇല പാനീയവും ഉൾപ്പെടെയുള്ള പ്രതിവിധികൾ ശുപാർശ ചെയ്യുന്നുണ്ട്. തൊണ്ടവേദന, ചുമ എന്നിങ്ങനെയുള്ള കൊവിഡ് ലക്ഷണങ്ങൾക്കെതിരെ പ്രവർത്തിക്കാൻ ഇത്തരം ചായകൾക്ക് സാധിക്കുമെന്നാണ് അധികൃതരുടെ വാദം. ശരീരത്തിൽ ജലാംശം നിലനിർത്താൻ രോഗികൾക്ക് ഈ ചായകുടി ശീലം സഹായിക്കുമെന്നാണ് വാദം.