പത്തനംതിട്ട: കൊടുമുടികൾ കീഴടക്കി മലയാളി എവറസ്റ്റിന് മുകളിലും ദേശീയ പതാക നാട്ടി. പത്തനംതിട്ട പന്തളം സ്വദേശി ഷെയ്ഖ് ഹസൻ ഖാനാണ് എവറസ്റ്റും കീഴടക്കി മലയാളകരക്ക് അഭിമാനമായി മാറിയത്. കഴിഞ്ഞ 14 നാണ് എവറസ്റ്റിനു മുകളിൽ ത്രിവർണ പതാക ഉയർത്തിയത്. ഏപ്രിൽ 28 ന് നാട്ടിൽ നിന്നും പുറപ്പെട്ട ഷെയ്ഖ് മേയ് മൂന്നിനു നേപ്പാളിലെത്തിയ ശേഷം നാലിന് എവറസ്റ്റ് ആരോഹണം ആരംഭിച്ചു. 14 ന് ബേസ് ക്യാമ്പിൽ എത്തിയതോടെ ചിത്രപ്രദർശനം നടത്തി. കേരളത്തിലെ 14 ജില്ലകളിലെ വിദ്യാർത്ഥികൾക്കിടയിൽ മലകയറ്റം വിഷയമാക്കി നടത്തിയ മത്സരത്തിൽ വിജയിച്ച ചിത്രങ്ങളാണ് പ്രദർശിപ്പിച്ചത്. പിന്നീട് ക്യാമ്പ് നാലിൽ അഭിമാന മുഹൂർത്തത്തിൽ ദേശീയ പതാകയുയർത്തി. 17 ന് മലയിറക്കം ആരംഭിച്ച് ബേസ് ക്യാമ്പിലെത്തി. അവിടെ നിന്നും കാഠ്മണ്ഡു വഴി നാട്ടിലേക്കും. ഭാരതീയരായ മൂന്ന് പേര് അടങ്ങുന്ന സംഘമാണ് മല മുകളിലേക്ക് തിരിച്ചതെങ്കിലും അസുഖ ബാധയേത്തുടർന്ന് രണ്ട് പേർ പിന്മാറുകയായിരുന്നു. പതിനാലോളം വിദേശികളും ഷെയ്ഖിനൊപ്പം മല കയറിയിട്ടുണ്ട്. സെക്രട്ടറിയേറ്റിൽ സീനിയർ ഗ്രേഡ് അസിസ്റ്റന്റായ ഷെയ്ഖിന് 30 ലക്ഷത്തോളം രൂപയാണ് ഈ ദൗത്യത്തിനു ചെലവായത്. മലകയറ്റം ഹരമായിരുന്ന ഷേക്ക് ആനമുടിയിലും അഗസ്ത്യാർകൂട മലനിരകളിലും പരിശീലനം നേടിയിരുന്നു. ഇന്ത്യയുടെ 75-ാം സ്വാതന്ത്ര്യ ദിനത്തിനു മുമ്പായി ഏഴ് ഭൂഖണ്ഡങ്ങളിലെയും ഉയരംകൂടിയ കൊടുമുടികൾ കീഴടക്കി അതിനു മുകളിൽ ഇന്ത്യയുടെ ദേശീയ പതാക പാറിക്കാനുള്ള ശ്രമത്തിനിടയിലാണ് എവറസ്റ്റിന് മുകളിൽ എത്തിയത്. പ്രതിരോധ മന്ത്രാലയത്തിനു കീഴിലുള്ള ഉത്തരകാശിയിലെ നെഹ്രു പർവതാരോഹണ പരിശീലനകേന്ദ്രത്തിൽ ഒരുമാസത്തെ പരിശീലനത്തിനു ശേഷമാണ് കൊടുമുടി കയറ്റങ്ങൾ ആരംഭിച്ചത്. പരിശീലന കേന്ദ്രത്തിൽ 200 പേർക്കൊപ്പം ഈ മലയാളിയും ഹിമാലയൻ മലനിരകളിൽ കയറിയിറങ്ങി അഡ്വാൻസ് മൗണ്ടനിയറിങ് പൂർത്തിയാക്കി. കാലാവസ്ഥാ വ്യതിയാനത്തിലും ഏത് സാഹചര്യത്തിലും മല കയറുവാനും ദിവസങ്ങളോളം കഴിയുവാനുള്ള പരിശീലനവും മനസിനെ ഇതിനായി തയാറാക്കി എടുക്കുകയാണ് ഇവിടെ നിന്നും സ്വായത്തമാക്കുന്നത്. പരിശീലനം പൂർത്തിയാക്കിയതോടെ പർവതങ്ങൾ കീഴടക്കാനുള്ള ധൈര്യവും സമ്പാദിച്ചു. ഇന്ത്യൻ മൗണ്ടനീയറിങ് ഫൗണ്ടേഷൻ അംഗവുമായി. ഏഴ് ഭൂഖണ്ഡങ്ങളിലെയും ഉയരംകൂടിയ കൊടുമുടികൾ കീഴടക്കുകയെന്ന ലക്ഷ്യവുമായി ഷെയ്ഖ് ഹസൻ ഖാൻ ആദ്യം കയറിയത് ആഫ്രിക്കൻ ഭൂഖണ്ഡത്തിലെ ടാൻസാനിയായിലെ ഉയരംകൂടിയ കൊടുമുടിയായ കിളിമഞ്ചാരോയാണ്. 19340 അടി ഉയരമുള്ള കിളിമഞ്ചാരോ, ഷെയ്ഖ് കീഴടക്കിയത് കഴിഞ്ഞ ഫെബ്രുവരി പതിനൊന്നിനാണ്. പിന്നീട് മണാലിയിലെ ചെറിയ പർവതങ്ങളുടെ ഉയരത്തിലുമെത്തി. ലഡാക്കിലെ കൊടുമുടികളിൽ ഒന്നായ 7,135 മീറ്റർ ഉയരത്തിൽ സ്ഥിതിചെയ്യുന്ന നൂനും റഷ്യയിലെ ഏറ്റവും ഉയരം കൂടിയ 5642 മീറ്റർ ഉയരമുള്ളതുമായ എൽബ്രസ് പർവതവും കയറുവാനുള്ള തയ്യാറെടുപ്പിലാണ് ഇദ്ദേഹം. പന്തളം പൂഴിക്കാട് കൂട്ടംവെട്ടിയിൽ അലി അഹമ്മദിന്റെയും ഷാഹിദയുടെയും മകനാണ് ഷെയ്ഖ്. ഖദീജാ റാണിയാണ് ഭാര്യ. മകൾ ജഹനാര മറിയം.