കുവൈറ്റ് സിറ്റി: കുവൈറ്റ് തീരത്തിനരികെ സമുദ്ര ജലത്തില്‍ ഒഴുകി നടക്കുകയായിരുന്ന 20 കിലോ ഹാഷിഷ് കണ്ടെത്തിയതായി കുവൈറ്റ് കോസ്റ്റ് ഗാര്‍ഡ്. ആറ് ബാഗുകളിലായാണ് മാരക മയക്കുമരുന്ന് കണ്ടെത്തിയത്. പതിവ് പട്രോളിംഗിനിടെ എന്തോ സമുദ്ര നിരപ്പില്‍ ഒഴുകി നടക്കുന്നത് ശ്രദ്ധയില്‍ പെട്ട കോസ്റ്റ് ഗാര്‍ഡ് അവ കണ്ടെത്തി പരിശോധിച്ചപ്പോഴാണ് ആറ് ബാഗുകളിലായി ഭദ്രമായി സൂക്ഷിച്ച ഹാഷിഷ് കണ്ടെത്തിയത്. തെക്കന്‍ കുവൈറ്റ് തീരത്തോട് ചേര്‍ന്നായിരുന്നു ഈ മയക്കുമരുന്ന് വേട്ട. എന്നാല്‍ ഇത് കടലില്‍ എത്താനുള്ള സാഹചര്യമോ ഇത് ആരാണ് ഇവിടെ എത്തിച്ചതെന്നോ ആര്‍ക്കു വേണ്ടി ഉള്ളതാണെന്നോ ഉള്ള കാര്യങ്ങളില്‍ വ്യക്തതയില്ല. ഇതേക്കുറിച്ചുള്ള അന്വേഷണം ആരംഭിച്ചതായി പോലിസ് അറിയിച്ചു. അതിനിടെ രാജ്യത്തേക്കുള്ള മയക്കു മരുന്ന് കടത്തിന്റെ തോത് അടുത്ത കാലത്തായി വലിയ തോതില്‍ വര്‍ധിച്ചിട്ടുള്ളതായി അധികൃതരെ ഉദ്ധരിച്ച് അല്‍ ജരീദ പത്രം റിപ്പോര്‍ട്ട് ചെയ്തു. ഇതേത്തുടര്‍ന്ന് പരിശോധന ശക്തമാക്കിയ സാഹചര്യത്തില്‍ മയക്കുമരുന്ന് കടത്തുമായി ബന്ധപ്പെട്ട് കഴിഞ്ഞ ഒരു വര്‍ഷത്തിനുള്ളില്‍ 3000ത്തിലേറെ പേരെ അറസ്റ്റ് ചെയ്തതായും റിപ്പോര്‍ട്ടിലുണ്ട്. മയക്കുമരുന്നിന്റെ വന്‍ ശേഖരം ഇവരില്‍ നിന്ന് കണ്ടെടുക്കുകയും ചെയ്തു. കഴിഞ്ഞ വര്‍ഷം 1700 കിലോഗ്രാം ഹാഷിഷ് കുവെെറ്റിൽ നിന്നും പിടിച്ചെടുത്തിരുന്നുപിടിച്ചെടുത്താണ് കുവൈറ്റ് പോലിസിന്റെ ഏറ്റവും വലിയ മയക്കുമരുന്ന് വേട്ട. ഒരു കോടി മയക്കുമരുന്ന് ഗുളികകളും 30 കിലോ ഹെറോയിനും 200 കിലോ മെത്താംഫെറ്റാമിനും കഴിഞ്ഞ വര്‍ഷം പല ഇടങ്ങളില്‍ നിന്നായി പിടിച്ചെടുക്കുകയുണ്ടായി. മയക്കുമരുന്ന് കേസുമായി ബന്ധപ്പെട്ട് പിടിയിലായവരില്‍ 1500 പേര്‍ സ്വദേശികളും 800 പേര്‍ സ്റ്റേറ്റ് രഹിതരായ ബദവികളും 300 പേര്‍ ഈജിപ്ത് പൗരന്‍മാരുമാണ്. സിറിയ, ലബനാന്‍, ഇന്ത്യ, ബംഗ്ലാദേശ്, പാകിസ്താന്‍ എന്നിവിടങ്ങളില്‍ നിന്നുള്ളവരാണ് ബാക്കിയുള്ളവര്‍. മയക്കുമരുന്ന് കേസുകളുമായി ബന്ധപ്പെട്ട് 566 പ്രവാസികളെ കുവൈറ്റില്‍ നിന്ന് നാടുകടത്തിയിട്ടുമുണ്ട്. മയക്കു മരുന്ന് ഉപയോഗിച്ചതിനും ക്രിമിനല്‍ കേസിന് വകുപ്പില്ലാത്ത ചെറിയ അളവ് മയക്കുമരുന്നുകള്‍ കൈവശം വച്ചതിനുമാണ് ഇവരെ പിടികൂടി കുവൈറ്റില്‍ നിന്നും കയറ്റി അയച്ചത്. വധശിക്ഷ മയക്കുമരുന്ന് കടത്തിന് ശക്തമായ ശിക്ഷയാണ് കുവൈറ്റിലുള്ളത്.