കണ്ണൂർ : പാലുവാങ്ങാനെത്തിയ ആൾ കവർ നൽകാത്തതിന്റെ ദേഷ്യത്തിൽ കടക്കാരനെ കുത്തി വീഴ്ത്തി. കണ്ണൂർ മേലെ ചൊവ്വയിലാണ് സംഭവം. താഴെചൊവ്വയിലെ മിൽമ ബൂത്തിൽ നിന്നും പാൽവാങ്ങി കവറുകൊടുത്തില്ലെന്ന് ആരോപിച്ച് കടയുടമയെ കുത്തി പരിക്കേൽപിക്കുകയായിരുന്നു. സംഭവത്തിൽ തിലാന്നൂർ സ്വദേശി സത്താറി(58)നെ കണ്ണൂർ ടൗൺ സി.ഐ ശ്രീജിത്ത് കൊടേരിയുടെ നേതൃത്വത്തിലുള്ള സംഘം അറസ്റ്റ് ചെയ്തു. താഴെചൊവ്വയിൽ മിൽമബൂത്ത് നടത്തുന്ന കണ്ണൂർ സിറ്റി സ്വദേശി എം.ഹാരിസ്(55)നാണ് കുത്തേറ്റത്. ഗുരുതര പരിക്കേറ്റ ഇയാൾ കണ്ണൂരിലെ സ്വകാര്യ ആശുപത്രിയിൽ ചികിത്സയിലാണ്. ഇന്നലെ വൈകുന്നേരത്തോടെയാണ് സംഭവം. പാൽവാങ്ങാനായി മിൽമാബൂത്തിലെത്തിയ സത്താർ പാൽ വാങ്ങിയ ശേഷം കവർ ആവശ്യപ്പെട്ടു. എന്നാൽ കവർ നൽകാറില്ലെന്ന് ഹാരിസ് അറിയിച്ചതോടെ ഇരുവരും തമ്മിൽ വാക്കുതർക്കമുണ്ടായി. തുടർന്ന് പ്രതി ഹാരിസിനെ കത്തിയെടുത്ത് കുത്തിപരിക്കേൽപിക്കുകയായിരുന്നു. ഹാരിസിന്റെ നെഞ്ചിനും കാലിനുമാണ് പരിക്കേറ്റത്. പ്രതിയെ ഇന്ന് കോടതിയിൽ ഹാജരാക്കും.