ന്യൂഡൽഹി: രഹസ്യാന്വേഷണ
വിഭാഗം കൈമാറിയ രേഖകളുടെ അടിസ്ഥാനത്തിലാണ് മീഡിയ വൺ ചാനലിന് ക്ലിയറൻസ്
നിഷേധിച്ചതെന്ന് കേന്ദ്ര സർക്കാർ സുപ്രീംകോടതിയിൽ. രഹസ്യാന്വേഷണ വിഭാഗം നൽകിയ
രേഖകൾ മീഡിയ വൺ ചാനലിന് കൈമാറാനാകില്ല. കൈമാറിയാൽ രാജ്യസുരക്ഷയുമായി ബന്ധപ്പെട്ട്
ചിന്തിക്കാനാകാത്ത ദൂരവ്യാപക പ്രത്യാഘാതം ഉണ്ടാകുമെന്നാണ് കേന്ദ്രം
സുപ്രീംകോടതിയിൽ വ്യക്തമാക്കിയിരിക്കുന്നത്. ചാനലിന് എന്തുകൊണ്ട് സംപ്രേക്ഷണ അനുമതി നിഷേധിച്ചു എന്ന
കാര്യം കേരള ഹൈക്കോടതിക്ക് മുദ്രവെച്ച കവറിൽ കൈമാറിയിട്ടുണ്ട്. സുപ്രീംകോടതി
അനുവദിച്ചാൽ അവ മുദ്രവെച്ച കവറിൽ സമർപ്പിക്കാൻ തയ്യാറാണെന്നും കേന്ദ്രം
വ്യക്തമാക്കുന്നു. ലൈസൻസ് പുതുക്കി ലഭിക്കണമെന്ന് ചാനലിന് അവകാശമായി പറയാൻ
കഴിയില്ലെന്നും കേന്ദ്രം സത്യവാങ്മൂലത്തിൽ പറയുന്നു. ചടങ്ങളിൽ പറയുന്ന കാര്യങ്ങൾ പാലിച്ചാൽ മാത്രമേ ലൈസൻസ്
പുതുക്കി നൽകാൻ കഴിയൂ. സംപ്രേക്ഷണ വിലക്ക് ചോദ്യം ചെയ്ത് മീഡിയ വൺ ഉടമകൾ നൽകിയ
ഹർജികൾ തള്ളണമെന്നും കേന്ദ്രം ആവശ്യപ്പെട്ടു. കേന്ദ്ര വാർത്താ വിതരണ മന്ത്രാലയ ഡയറക്ടർ വൃന്ദ മനോഹർ
ദേശായിയാണ് സുപ്രീംകോടതിയിൽ സത്യവാങ്മൂലം ഫയൽ ചെയ്തിരിക്കുന്നതെന്ന് മാതൃഭൂമി
ന്യൂസ് റിപ്പോർട്ട് ചെയ്തു. ക്ലിയറൻസ് നിഷേധിച്ചത് എന്തിനെന്ന് ചാനലിനെ
അറിയിക്കേണ്ടതില്ല. ഇത് സർക്കാരിന്റെയും സർക്കാർ സംവിധാനങ്ങളുടെയും താൽപര്യം
കണക്കിലെടുത്തുള്ള നയമാണെന്നും കേന്ദ്രം വ്യക്തമാക്കി.