കുവൈറ്റ് സിറ്റി: കുവൈറ്റ് തെരുവു നായകളെയും പൂച്ചകളെയും നിര്‍ദ്ദാക്ഷിണ്യം വിഷം കൊടുത്ത് കൊല്ലുന്ന സംഭവങ്ങള്‍ വ്യാപകമായതായി പരാതി. ഭക്ഷണത്തില്‍ വിഷം കലര്‍ത്തി നല്‍കി അവയെ കൊല്ലുകയാണെന്നാണ് മൃഗസ്‌നേഹികള്‍ പറയുന്നത്. ഇങ്ങനെ വിഷയം കലര്‍ത്തി വയ്ക്കുന്ന ഭക്ഷണം കഴിച്ച് നാലും അഞ്ചും ദിവസം നരകിച്ച ശേഷമാണ് അവയ്ക്ക് ജീവന്‍ നഷ്ടമാവുന്നത്. എന്നു മാത്രമല്ല, പട്ടികളെയും പൂച്ചകളെയും കൊല്ലാന്‍ വയ്ക്കുന്ന വിഷം കലര്‍ത്തിയ ഭക്ഷണം കഴിച്ച് നിരവധി പക്ഷികളും ക്രൂരതയ്ക്ക് ഇരയാവുകയാണെന്നും അവര്‍ ആരോപിച്ചു. രാജ്യത്ത് തെരുവുനായ ശല്യം രൂക്ഷമായ ഫ്രൈഡേ മാര്‍ക്കറ്റിലെ അല്‍ റായ് ഏരിയയിയും ഇറാനിയന്‍ മാര്‍ക്കറ്റിന്റെ പരിസരങ്ങളിലുമാണ് വിഷം നല്‍കി മൃഗങ്ങളെ കൊല്ലുന്ന രീതി വ്യാപകമായിരിക്കുന്നത്. ഇതിനെതിരേ അധികൃതര്‍ മുന്നറിയിപ്പ് നല്‍കിയരുന്നുവെങ്കിലും ഏറെ നാളായി ഈ ക്രൂരത തുടരുകയാണെന്നും പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തു. തെരുവു നായകള്‍ ജനങ്ങള്‍ക്കുണ്ടാക്കുന്ന ഉപദ്രവം കടുത്തതാണെങ്കിലും അവയുടെ ഭീഷണി ഇല്ലാതാക്കുന്നതിന് ശാസ്ത്രീയമായ രീതികള്‍ അവലംബിക്കണമെന്നതാണ് അവരുടെ ആവശ്യം. നായകളെ വന്ധ്യംകരിക്കുന്നതു വഴി അവയുടെ എണ്ണം പെരുകാതെ നിയന്ത്രിക്കാനും. നായകളെയും പൂച്ചകളെയും ഏറ്റെടുത്ത് വളര്‍ത്താന്‍ താല്‍പര്യമുള്ളവര്‍ക്ക് അതിനുള്ള സംവിധാനങ്ങള്‍ ഒരുക്കിക്കൊടുക്കണം. അവയ്ക്കായി പ്രത്യേക ഷെല്‍ട്ടറുകള്‍ ഉണ്ടാക്കി പാര്‍പ്പിക്കുന്നതിനുള്ള സംവിധാനവും ഏര്‍പ്പെടുത്താമെന്നും അവര്‍ പറയുന്നു. അല്ലാതെ ഭക്ഷണത്തില്‍ വിഷം കലര്‍ത്തി നല്‍കി ദിവസങ്ങളോളം അവയെ നരകിക്കാന്‍ വിടുന്നത് മനുഷ്യത്വ രഹിതവും ക്രൂരവുമായ കാര്യമാണെന്നും ഇക്കാര്യത്തില്‍ അധികൃതരുടെ ഭാഗത്തു നിന്ന് അടിയന്തര നടപടികള്‍ ഉണ്ടാവണമെന്നും മൃഗാവകാശ പ്രവര്‍ത്തകര്‍ വ്യക്തമാക്കി. ഇക്കാര്യത്തില്‍ ആവശ്യമായ നിയമ നിര്‍മാണം വേണം. കീടനാശിനികള്‍ നിര്‍മിക്കുന്ന കമ്പനികളിലെ ജീവനക്കാരാണ് ഈ ക്രൂരതയ്ക്കു പിന്നിലെന്നാണ് ആക്ടിവിസ്റ്റുകളുടെ ആക്ഷേപം. വളര്‍ത്തു മൃഗങ്ങളെ പരിപാലിക്കുന്ന കാര്യത്തില്‍ കൃത്യമായ മാര്‍ഗ നിര്‍ദേശങ്ങള്‍ അധികൃതരുടെ ഭാഗത്തു നിന്ന് ഉണ്ടാവണം. മൃഗങ്ങളെ വളര്‍ത്തുന്നവര്‍ ഒരു സമയം കഴിഞ്ഞാല്‍ അവയെ തെരുവിലേക്ക് ഇറക്കിവിടുന്ന സ്ഥിതിയുണ്ട്. തെരുവു നായകളുടെ വ്യാപനത്തിന് ഇത് കാരണമാവുന്നുണ്ടെന്നും ആക്ടിവിസ്റ്റുകള്‍ കുറ്റപ്പെടുത്തി.