ന്യൂഡല്‍ഹി : സന്തൂര്‍ വിദഗ്ധനും പ്രശസ്തസംഗീതസംവിധായകനുമായ പണ്ഡിറ്റ് ഭജന്‍ സോപോരി അന്തരിച്ചു. 71 വയസ്സായിരുന്നു. ഗുരുഗ്രാമിലെ ഫോര്‍ട്ടിസ് ആശുപത്രിയില്‍ ചികിത്സയിലായിരുന്നു അദ്ദേഹം.. ശിവകുമാര്‍ ശര്‍മ്മയ്ക്കു ശേഷം കശ്മിരില്‍ നിന്ന് സന്തൂര്‍ സംഗീതത്തെ ലോകപ്രശസ്തനാക്കിയ സംഗീതകാരനാണ് ഭജന്‍ സോപോരി. ഇന്ത്യന്‍ ശാസ്ത്രീയ സംഗീതത്തിന് നല്‍കിയ സംഭാവനകള്‍ക്ക് 1992-ല്‍ സംഗീത നാടക അക്കാദമി അവാര്‍ഡും 2004-ല്‍ പത്മശ്രീയും നല്‍കി സോപോരിയെ ആദരിച്ചിരുന്നു.
1948-ല്‍ കാശ്മീരിലെ സോപോര്‍ താഴ്വരയില്‍ ജനിച്ച പണ്ഡിറ്റ് ഭജന്‍ സോപോരി ഇന്ത്യന്‍ ശാസ്ത്രീയ സംഗീതത്തിലെ സൂഫിയാന ഘരാനയില്‍ ശൈലിയുടെ പ്രയോക്താവായിരുന്നു. 1953-ല്‍ അഞ്ചാം വയസ്സില്‍ ഭജന്‍ സോപോരി തന്റെ ആദ്യ പ്രകടനം നടത്തി. വാഷിംഗ്ടണ്‍ യൂണിവേഴ്‌സിറ്റിയില്‍ നിന്ന് പാശ്ചാത്യ ശാസ്ത്രീയ സംഗീതവും മുത്തച്ഛന്‍ എസ് സി സോപോരിയില്‍ നിന്നും പിതാവ് ശംഭൂ നാഥില്‍ നിന്നും ഹിന്ദുസ്ഥാനിയും പഠിച്ചു. പിന്നീട് വാഷിംഗ്ടണ്‍ യൂണിവേഴ്‌സിറ്റിയില്‍ ഭജന്‍ സോപോരി സംഗീതാദ്ധ്യാപകനായി. ദശാബ്ദങ്ങള്‍ നീണ്ട സംഗീത കരിയറില്‍, ഈജിപ്ത്, ഇംഗ്ലണ്ട്, ജര്‍മ്മനി, യു.എസ്. തുടങ്ങിയ രാജ്യങ്ങളില്‍ കച്ചേരികള്‍ അവതരിപ്പിച്ചു.