ന്യൂഡല്‍ഹി: തുടര്‍ച്ചയായ നാലാം ദിവസവും രാജ്യത്ത് 20,000 ത്തിലധികം കൊവിഡ് കേസുകള്‍ റിപ്പോര്‍ട്ട് ചെയ്തു. കഴിഞ്ഞ 24 മണിക്കൂറിനിടെ 20,528 പേര്‍ക്കാണ് രാജ്യത്ത് രോഗബാധ സ്ഥിരീകരിച്ചത്. 49 മരണവും സ്ഥിരീകരിച്ചതായി കേന്ദ്ര ആരോഗ്യ മന്ത്രാലയം വ്യക്തമാക്കി.
ഇതോടെ രാജ്യത്തെ ആകെ കൊവിഡ് കേസുകള്‍ 4,37,50,599 ആയി ഉയര്‍ന്നു. നിലവില്‍ 1,43,449 സജീവ കേസുകളാണ് ഉള്ളത്. പുതുതായി 49 മരണങ്ങള്‍ റിപ്പോര്‍ട്ട് ചെയ്തതോടെ ആകെ മരണസംഖ്യ 5,25,709 ആയി ഉയര്‍ന്നു.
അതേസമയം, കൊവിഡ് പ്രതിരോധത്തില്‍ വാക്‌സിനേഷന്‍ 200 കോടിയിലേക്ക് കടക്കുന്നതായി കേന്ദ്ര ആരോഗ്യ മന്ത്രാലയം അറിയിച്ചു. 2021 ജനുവരി 16 നാണ് ഇന്ത്യന്‍ നിര്‍മിത വാക്‌സിനുകളായ കൊവാക്‌സിനും കൊവിഷീല്‍ഡും വിതരണം ചെയ്തു തുടങ്ങിയത്.
രാജ്യത്ത് കൊവിഡ് പോസിറ്റിവിറ്റി നിരക്കിലും വര്‍ധനയുണ്ട്. 5.23 ശതമാനമായി പോസിറ്റിവിറ്റി നിരക്ക് ഉയര്‍ന്നു. അതേസമയം, കേരളത്തില്‍ ഇന്നലെ 2601 പേര്‍ക്കാണ് രോഗബാധ സ്ഥിരീകരിച്ചത്. 24 മരണവും കാരണമാണെന്നും സ്ഥിരീകരിച്ചു.
18 നും 59 നും ഇടയില്‍ പ്രായമുള്ളവര്‍ക്കുള്ള സൗജന്യ ബൂസ്റ്റര്‍ ഡോസ് വാക്‌സിന്‍ വിതരണം ഇന്ന് മുതല്‍ ആരംഭിക്കും. വാക്‌സിനേഷന്‍ അമൃത് മഹോത്സവ് എന്ന പേരില്‍ 75 ദിവസം നീണ്ടും നില്‍ക്കുന്ന വാക്‌സിന്‍ വിതരണമാണ് ഇന്ന് ആരംഭിക്കുന്നത്. സ്വാതന്ത്ര്യത്തിന്റെ 75ാം വാര്‍ഷികം പ്രമാണിച്ചാണ് വാക്‌സിനേഷന്‍ യജ്ഞം.