ഗാന്ധിനഗർ: അതിതീവ്ര മഴ തുടരുന്ന ദക്ഷിണ ഗുജറത്തിലെ വിവിധ പ്രദേശങ്ങളിൽ നിന്ന് ആയിരക്കണക്കിന് ആളുകളെ മാറ്റിപ്പാർപ്പിച്ചു. ഞായറാഴ്ച വൈകീട്ട് ആരംഭിച്ച കനത്ത മഴയെത്തുടർന്ന് പലയിടങ്ങളിലും വെള്ളക്കെട്ട് രൂപപ്പെട്ടു. അഹമ്മദാബാദിന്‍റെ കിഴക്കൻ മേഖലകളിൽ റോഡുകളിൽ വെള്ളം കയറിയ നിലയിലാണ്. സംസ്ഥാനത്ത് സ്കൂളുകളും കോളേജുകളും ഉൾപ്പെടെയുള്ള വിദ്യാലയങ്ങൾക്ക് ഇന്ന് അവധി പ്രഖ്യാപിച്ചിട്ടുണ്ട്.
അടുത്ത രണ്ട് ദിവസം കൂടി ശക്തമായ മഴ തുടരുമെന്നാണ് മുന്നറിയിപ്പ്. ഛോട്ടാ ഉദേപൂരിൽ 12 മണിക്കൂറിനിടെ പെയ്തത് 1433 മില്ലിമീറ്റർ മഴയാണ്. ഛോട്ടാ ഉദേപൂർ, നവ്സാരി, വൽസാഡ്, നർമ്മദ, പഞ്ച് മഹൽ ജില്ലകളിൽ തീവ്ര മഴയാണ് ലഭിക്കുന്നത്. ദുരിത ബാധിത പ്രദേശങ്ങളിൽ നിന്ന് 3250 പേരെ ഇതിനോടകം മാറ്റിപ്പാർപ്പിച്ചു. ഛോട്ടാ ഉദേപൂരിൽ നിന്ന് 400, നവ്സാരിയിൽ നിന്ന് 550, വൽസാഡിൽ നിന്ന് 470 പേർ എന്നിങ്ങനെയാണ് ആളുകളെ മാറ്റിപാർപ്പിച്ചത്.
കനത്ത മഴ തുടരുന്നതോടെ പല ജില്ലളിലും ജനലനിരപ്പ് ഉയർന്നിട്ടുണ്ട്. ദുരിതബാധിത പ്രദേശങ്ങളിൽ നിന്ന് കൂടുതൽ ആളുകളെ ഒഴിപ്പിക്കുന്നതിന് തയ്യാറെടുപ്പുകൾ നടത്തണമെന്ന് മുഖ്യമന്ത്രി ഭൂപേന്ദ്ര പട്ടേൽ ജില്ലാ കളക്ടർമാരോട് ആവശ്യപ്പെട്ടു. പലയിടത്തും പൊതുഗതാഗതം തടസപ്പെട്ട അവസ്ഥയാണ് ഉള്ളത്.
മഴ ദുരിതം നേരിടാൻ എൻഡിആർഎഫിന്‍റെ 13 സംഘങ്ങൾ സംസ്ഥാനത്ത് എത്തിയിട്ടുണ്ട്. സംസ്ഥാന ദുരന്തനിവാരണ സേനയും രംഗത്ത് ഉണ്ട്. കേന്ദ്ര കാലാവസ്ഥാ വകുപ്പിന്‍റെ മുന്നറിയിപ്പ് പ്രകാരം തെക്കൻ ഗുജറാത്ത്‌ തീരം മുതൽ വടക്കൻ കേരള തീരം വരെയും ന്യുനമർദ്ദ പാത്തി നിലനിൽക്കുന്നുണ്ട്. ഇതിന്‍റെ ഫലമായി അടുത്ത 5 ദിവസം വ്യാപകമായ മഴ തുടരുമെന്നാണ് മുന്നറിയിപ്പ്. കേരളത്തിലും ഈ ദിനങ്ങളിൽ ശക്തമായ മഴ തുടരും. ജൂലൈ 13 മുതൽ 15 വരെ കേരളത്തിൽ ഒറ്റപ്പെട്ട ശക്തമായ മഴക്കും സാധ്യതയുണ്ടെന്നും കേന്ദ്ര കാലാവസ്ഥ വകുപ്പ് മുന്നറിയിപ്പിലുണ്ട്.