കൊളംബോ: പ്രസിഡന്റിന്റെ വസതിയിൽ നിന്നും മോഷ്ടിച്ച വസ്തുക്കൾ തെരുവിൽ വിറ്റതിന് മൂന്ന് പേർ അറസ്റ്റിൽ. ശ്രീലങ്കയിൽ നിന്നുമാണ് ഇത്തരത്തിൽ ഒരു വാർത്ത റിപ്പോർട്ട് ചെയ്തിരിക്കുന്നത്. ശ്രീലങ്കൻ പ്രസിഡൻറ് ഹൗസിൽ നിന്ന് മോഷ്ടിച്ച 40 സ്വർണ്ണം പൂശിയ പിച്ചള സോക്കറ്റുകൾ വിൽക്കാൻ ശ്രമിച്ചതിനാണ് മൂന്ന് പേരെ ശ്രീലങ്കൻ പോലീസ് അറസ്റ്റ് ചെയ്തിരിക്കുന്നത്. രാജ്യത്ത് നടക്കുന്ന കടുത്ത സാമ്പത്തിക പ്രതിസന്ധിയിൽ പ്രതിഷേധിച്ച് നടന്ന സർക്കാർ വിരുദ്ധ പ്രതിഷേധത്തിനിടെ പ്രകോപിതരായ ജനക്കൂട്ടം കെട്ടിടത്തിലേക്ക് ഇരച്ച് കയറുകയായിരുന്നു. ജൂലൈ ഒൻപതിന് മുൻ പ്രസിഡന്റ് ഗോതബയ രാജപക്‌സെയുടെ ഔദ്യോഗിക വസതിയും മുൻ പ്രധാനമന്ത്രി റനിൽ വിക്രമസിംഗെയുടെ സ്വകാര്യ വസതിയും സർക്കാർ വിരുദ്ധ പ്രക്ഷോഭകർ കയ്യടക്കിയിരുന്നു. അതിന് പുറമെ, വിക്രമസിംഗെയുടെ സ്വകാര്യ വസതിയും ജനക്കൂട്ടം കത്തിച്ചിരുന്നു.
പ്രസിഡന്റിന്റെ വസതിയിൽ അതിക്രമിച്ച് കടന്ന സംഘത്തിൽ മൂന്ന് പേരാണ് മോഷണം നടത്തിയത്. ജനൽ കർട്ടനുകൾ തൂക്കുന്നതിനായി ചുവരുകളിൽ ഉറപ്പിച്ച 40 സ്വർണ്ണം പൂശിയ പിച്ചള സോക്കറ്റുകളാണ് ഇവർ മോഷ്ടിച്ചത്. ഞായറാഴ്ച മോഷ്ടിച്ച സാധനങ്ങൾ വിൽക്കാൻ ശ്രമിക്കുന്നതിനിടെയാണ് വേലിക്കട പോലീസ് പ്രതികളെ പിടികൂടുകയായിരുന്നു. പ്രതികളെ അറസ്റ്റ് ചെയ്തതായി ഓൺലൈൻ മാധ്യമമായ ഡെയ്‌ലി മിറർ റിപ്പോർട്ട് ചെയ്തു.
28, 34, 37 എന്നിങ്ങനെ പ്രായമുള്ള മൂന്ന് പ്രദേശവാസികളാണ് അറസ്റ്റിലായിരിക്കുന്നത്. ശ്രീലങ്കയിലെ രാജഗിരിയയിലെ ഒബേശേഖരപുര സ്വദേശികളാണ് മൂന്ന് പേരും. പ്രതികൾ മൂവരും മയക്കുമരുന്നിന് അടിമകളാണെന്ന് സംശയിക്കുന്നതായി പോലീസ് മാധ്യമങ്ങളോട് പറഞ്ഞു.
ഇവർക്കെതിരെയുള്ള അന്വേഷണം കൈകാര്യം ചെയ്യുന്ന കൊളംബോ (നോർത്ത്) ക്രിമിനൽ ഇൻവെസ്റ്റിഗേഷൻ ഡിവിഷനു കൈമാറുമെന്നും റിപ്പോർട്ടിൽ പറയുന്നു.
ആദ്യഘട്ട അന്വേഷണത്തിൽ വിലപിടിപ്പുള്ള 1000 ഉൽപന്നങ്ങൾ മോഷ്ടിക്കപെട്ടിരുന്നുവെന്നാണ് കണ്ടെത്തിയിരിക്കുന്നത്.
പ്രസിഡൻഷ്യൽ പാലസിൽ നിന്നും പ്രധാനമന്ത്രിയുടെ ഔദ്യോഗിക വസതിയിൽ നിന്നും അപൂർവ പുരാവസ്തുക്കൾ ഉൾപ്പെടെയുള്ള മൂല്യമുള്ള വസ്തുക്കളാണ് മോഷണം പോയിരിക്കുന്നത്.
കഴിഞ്ഞദിവസം നൂറുകണക്കിന് സൈനികർ എത്തി പ്രസിഡന്റിന്റെ കൊട്ടാരത്തിൽ പ്രക്ഷോഭം നടത്തിയിരുന്ന ആളുകളെ അടിച്ചോടിച്ചിരുന്നു. പുതിയ പ്രസിഡന്റായി റെനിൽ വിക്രമസിംഗെ അധികാരത്തിൽ എത്തിയതിന് പിന്നാലെയാണ് പുതിയ സൈനിക നടപടിയുണ്ടായിരിക്കുന്നത്. 225 അംഗ പാർലമെന്റിൽ 134 പേരുടെ പിന്തുണയോടെയാണ് വിക്രമസിംഗെ അധികാരത്തിലേക്ക് എത്തിയത്. ദിനേശ് ഗുണവർധനെ പ്രധാനമന്ത്രിയായി പ്രഖ്യാപിച്ചിട്ടുണ്ടെന്നാണ് റിപ്പോർട്ടുകൾ.