കൊല്ലം: പുനലൂരില്‍ വനത്തില്‍ അതിക്രമിച്ച് കയറിയ വ്‌ളോഗര്‍ക്കെതിരെ കേസ്. കിളിമാനൂര്‍ സ്വദേശി അമല അനുവിനെതിരെയാണ് കേസെടുത്തത്. വനത്തിനുള്ളില്‍ അതിക്രമിച്ച് കയറി, കാട്ടാനയെ ഭയപ്പെടുത്തി ഓടിച്ചു, ഹെലിക്യാം ഉപയോഗിച്ച് കാട്ടാനയുടെ ദൃശ്യങ്ങള്‍ പകര്‍ത്തി എന്നിങ്ങനെയുള്ള കുറ്റങ്ങളാണ് വ്‌ളോഗര്‍ക്കെതിരെ ചുമത്തിയിരിക്കുന്നത്. എട്ട് മാസം മുമ്പ് മാമ്പഴത്തറ വനമേഖലയില്‍ ചിത്രീകരിച്ച ദൃശ്യങ്ങള്‍ക്ക് അടിസ്ഥാനമാക്കിയാണ് നടപടി എടുത്തത്.
യൂട്യൂബില്‍ അപ്‌ലോഡ് ചെയ്ത ദൃശ്യങ്ങള്‍ പരിശോധിച്ച ശേഷം അനുവിനെതിരെ അമ്പനാട് ഡെപ്യൂട്ടി റേഞ്ച് ഓഫിസര്‍ അജയകുമാറാണ് കേസെടുത്തത്. പുനലൂര്‍ ഡിവിഷനല്‍ ഫോറസ്റ്റ് ഓഫിസര്‍ (ഡിഎഫ്ഒ) ഷാനവാസിന്റെ നിര്‍ദേശപ്രകാരം വനം വന്യജീവി നിയമത്തിലെ മറ്റ് ജാമ്യമില്ലാ വകുപ്പുകള്‍ ചുമത്തിയാണ് അമല അനുവിനെതിരെ കേസെടുത്തിരിക്കുന്നത്.
പുനലൂരിനും തെന്മലയ്ക്കും ഇടയിലുള്ള സംരക്ഷിത വനമേഖലയിലൂടെയാണ് ഇവര്‍ യാത്ര ചെയ്തത്. കാട്ടാന എവിടെയെന്ന് കണ്ടെത്തിയശേഷം ആനയുടെ സമീപമെത്തി ദൃശ്യങ്ങള്‍ ചിത്രീകരിക്കുകയായിരുന്നു. വ്‌ളോഗറെ കാട്ടാന ഓടിക്കുന്ന വീഡിയോ സമൂഹമാധ്യമങ്ങളില്‍ വൈറലായിരുന്നു. ഇവരുടെയൊപ്പം ഉണ്ടായിരുന്നവര്‍ക്കെതിരെയും അന്വേഷണം ഉണ്ടാകും.