മുംബൈ: പോലീസ് പിടിക്കാതിരിക്കാൻ ഫ്ലാറ്റിന്‍റെ നാലാം നിലയിൽ നിന്ന് എടുത്തുചാടിയ യുവാവിന് ദാരുണാന്ത്യം. മുംബൈ കൊളാബ പ്രദേശത്തെ ചർച്ച്ഗേറ്റിലുള്ള ഒരു ഫ്ലാറ്റിൽ വെള്ളിയാഴ്ചയായിരുന്നു സംഭവം. സമീപത്തെ കെട്ടിടത്തിലേക്ക് ചാടുന്നതിനിടെ താഴെ വീണ യുവാവിനെ ഉടൻ തന്നെ ആശുപത്രിയിലേക്ക് കൊണ്ട് പോയെങ്കിലും ജീവൻ രക്ഷിക്കാനായില്ല.
നാലാം നിലയിൽ നിന്ന് ചാടി ഗുരുതര പരിക്കേറ്റ രോഹിത് എന്ന 25കാരനാണ് ആശുപത്രിയിൽ ചികിത്സയിലിരിക്കെ മരിച്ചത്. ഫ്ലാറ്റിലേക്ക് അതിക്രമിച്ച് കയറിയ രോഹിത്തിനെ അറസ്റ്റ് ചെയ്യാനെത്തിയ പോലീസ് തന്നെയായിരുന്നു ആശുപത്രിയിലേക്ക് കൊണ്ട് പോയത്. എന്നാൽ ജീവൻ രക്ഷിക്കാൻ കഴിഞ്ഞില്ല. മൂന്ന് മണിക്കൂറോളം നീണ്ട് നിന്ന നാടകീയ സംഭവങ്ങൾക്കൊടുവിലായിരുന്നു യുവാവ് നാലാം നിലയിൽ നിന്ന് ചാടിയത്.
മൂന്ന് മണിക്കൂറോളം യുവാവിനെ അനുനയിപ്പിക്കാൻ ശ്രമിച്ചെങ്കിലും ഫലം കാണാതെ വന്നതോടെ ഒരു പോലീസുകാരൻ ഇയാൾക്കരികിലേക്ക് എത്താൻ ശ്രമിച്ചു. രാവിലെ 7.15 ഓടെയായിരുന്നു ഇത്. ഇതോടെ നാലാംനിലയിലിരിക്കുകയായിരുന്ന യുവാവ് തൊട്ടടുത്ത കെട്ടിടത്തിലേക്ക് ചാടുകയായിരുന്നു. താഴെ വീണ് ഗുരുതരമായി പരിക്കേറ്റ ഇയാളെ ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല.
പോലീസുകാരൻ ജനാല വഴി യുവാവിന് സമീപത്തേക്ക് എത്തിയപ്പോൾ 'വന്ദേ മാതരം' എന്ന് വിളിച്ചുകൊണ്ടാണ് രോഹിത് സമീപത്തെ കെട്ടിടം ലക്ഷ്യമാക്കി എടുത്ത് ചാടിയതെന്നാണ് ദൃക്സാക്ഷികൾ പറയുന്നത്. സംഭവത്തിൽ വിശദമായ അന്വേഷണം നടത്തുമെന്ന് പോലീസ് വ്യക്തമാക്കി.