കഴിഞ്ഞ ദിവസം രാത്രിയിലും കാട്ടാനകൂട്ടം എത്തി കൃഷി നശിപ്പിച്ചതോടെ ഇനി സ്ഥലം ഉപേക്ഷിച്ചു പോവുക എന്നതല്ലാതെ മറ്റ് എന്ത്‌ ചെയ്യണം എന്ന ആശങ്കയിലാണ് താമസക്കാർ. സ്കൂളിലേക്ക് പോകുന്ന വിദ്യാർത്ഥികൾ അടക്കം പകൽ സമയങ്ങളിൽ പോലും ആന ഭീതിയിൽ ആണ് യാത്ര ചെയ്യുന്നത്. പകലെന്നോ രാത്രിയെന്നോ ഭേദമില്ലാതെ മുഴുവൻ സമയങ്ങളിലും കാട്ടാനകൾ ഇവിടങ്ങളിൽ വിഹരിച്ചു കൊണ്ടിരിക്കയാണ്. ഇതിനൊരു ശാശ്വത പരിഹാരം ആനമതിൽ മാത്രമാണ്. എന്നാൽ സർക്കാരിന്റെ തീരുമാനങ്ങളിൽ നീണ്ടുപോകുന്ന ആനമതിൽ പ്രാവർത്തികമായി വരുമ്പോഴേക്കും ഇവിടെയുള്ള പല ജീവനുകളും നഷ്ടപ്പെട്ടിരിക്കും എന്നാണ് നാട്ടുകാർ പറയുന്നത്.
ഫാമും ജനവാസ മേഖലയും അതിർത്തി പങ്കിടുന്ന കീഴ്പ്പള്ളി ടൗണിന്റെ ഭാഗമായ കക്കുവപ്പുഴയുടെ തീരങ്ങളോട് ചേർന്നുള്ള ഭൂമിയിലാണ് ഇപ്പോൾ പകൽ സമയങ്ങളിൽ പോലും കാട്ടാനകൾ എത്തുന്നത്. ഹൈക്കോടതിപോലും അംഗീകരിച്ച ആനമതിൽ നിർമാണം തുരങ്കം വെക്കുന്ന സമീപനമാണ് അധികൃതരുടെ ഭാഗത്ത് നിന്ന് ഉണ്ടാവുന്നതെന്നാണ് പ്രദേശവാസികൾ പറയുന്നത്.