തിരുവനന്തപുരം: വീടിന്റെ നടവഴിയില്‍ മൂത്രം ഒഴിച്ചത് ചോദ്യം ചെയ്ത യുവാവിനെ പോലീസുകാരായ മൂവര്‍ സംഘം മര്‍ദ്ദിച്ചതായി പരാതി. കിളിമാനൂര്‍ ഇരട്ടച്ചിറ റീനാ ഭവനില്‍ റയില്‍വേ ജീവനക്കാരനായ രജീഷാണ് കിളിമാനൂര്‍ പോലീസില്‍ ഇതു സംബന്ധിച്ച് പരാതി നല്‍കിയത്. മുഖ്യമന്ത്രി പങ്കെടുത്ത പോലീസ് അസോസിയേഷന്റെ സംസ്ഥാന സമ്മേളനത്തിന്റെ പൊതുസമ്മേളനത്തില്‍ പങ്കെടുക്കാനെത്തിയ സംഘത്തിലുള്ളവരായിരുന്നു മര്‍ദ്ദിച്ചത്.
ചങ്ങനാശ്ശേരി പോലീസ് സ്റ്റേഷനിലെ സി പി ഒ നിബാസ് (36), എസ് സിപിഒ ജാബിന്‍ (40) ഡ്രൈവര്‍ സി പി ഒ പ്രശാന്ത് (41) എന്നിവര്‍ക്കെതിരെ 294 (b), 323& 34 ഐപിസി ആക്ട് പ്രകാരം കിളിമാനൂര്‍ പോലീസ് കേസെടുത്തു. ശനിയാഴ്ച ഉച്ചയ്ക്ക് 12 മണിയോടെ കിളിമാനൂര്‍ ബിവറേജ് ഔട്ട്‌ലെറ്റിന് സമീപമായിരുന്നു സംഭവം. ടെമ്പോ ട്രാവലറില്‍ എത്തിയ സംഘത്തിലെ മൂന്നുപേര്‍ വാഹനം നിര്‍ത്തിയ ശേഷം റോഡിനോട് ചേര്‍ന്ന വീട്ടിലേയ്ക്കുള്ള സ്വകാര്യ വഴിയില്‍ മൂത്രം ഒഴിച്ചത് രജീഷ് ചോദ്യം ചെയ്തതോടെ സംഘം അതിക്രമം നടത്തുകയായിരുന്നു.
അസഭ്യം വിളിയ്ക്കുകയും മുഖത്ത് കണ്ണിനു ഇരു വശവും ഇടിച്ചും മര്‍മ്മസ്ഥാനത്ത് തൊഴിച്ചും പരിക്കേല്‍പ്പിക്കുകയായിരുന്നെന്നാണ് പരാതി. മര്‍ദ്ദനത്തില്‍ പരിക്കേറ്റ രജീഷ് കേശവപുരം സാമൂഹ്യ ആരോഗ്യ കേന്ദ്രത്തില്‍ ചികിത്സ തേടി.