ബഹ്റെെൻ: പകർച്ചവ്യാധികളല്ലാത്ത മാരക രോഗങ്ങൾക്കെതിരെ നടപടി സ്വീകരിക്കുന്നതിന് ദേശീയ മെഡിക്കൽ ദൗത്യ സംഘത്തിന് രൂപം നൽകി ബഹ്റെെൻ. കിരീടാവകാശിയും പ്രധാനമന്ത്രിയുമായ പ്രിൻസ് സൽമാൻ ബിൻ ഹമദ് ആൽ ഖലീഫയാണ് ഇതുമായി ബന്ധപ്പെട്ട നടപടിക്ക് ഉത്തരവിട്ടത്. ആരോഗ്യ മന്ത്രിയായിരിക്കും സംഘത്തിന് അധ്യക്ഷ പദവി വഹിക്കുക. കൂടാതെ രാജ്യത്തെ ആരോഗ്യ രംഗത്ത് പ്രവർത്തിക്കുന്ന നിരവധി പേരെ സംഘത്തിൽ ഉൾപ്പെടുത്തിയിട്ടുണ്ട്.
ആരോഗ്യ മന്ത്രാലയത്തിലെ പൊതുജനാരോഗ്യ അസി. അണ്ടർ സെക്രട്ടറി, വാണിജ്യ, വ്യവസായ മന്ത്രാലയത്തിലെ പരിശോധന വിഭാഗം ഡയറക്ടർ, അനിമൽ ഹെൽത്ത് ഡിപ്പാർട്മെന്‍റ് ഡയറക്ടർ, ഹെൽത്ത് പ്രമോഷൻ ഡിപ്പാർട്മെന്‍റ് ഡയറക്ടർ, പൊതുജനാരോഗ്യ വിഭാഗം ഡയറക്ടർ, യുവജന ശാക്തീകരണ വകുപ്പ് ഡയറക്ടർ തുടങ്ങി 19 അംഗങ്ങൾ ഈ സംഘത്തിൽ ഉണ്ടാകും.
അടുത്ത ദിവസം ഇതുമായി ബന്ധപ്പെട്ട് യോഗം ചേരും. ആദ്യ യോഗത്തിൽ അംഗങ്ങളിൽനിന്ന് വൈസ് പ്രസിഡന്‍റിനെ തെരെഞ്ഞെടുക്കും. മൂന്ന് വർഷമായിരിക്കും അംഗങ്ങളുടെ കാലാവധി. മാരക രോഗങ്ങൾക്കെതിരെ ഫലപ്രദമായ നടപടി സ്വീകരിക്കുന്നതിന് വേണ്ടിയായിരിക്കും പ്രധാനമായും പ്രധാന്യം നൽകുക. ആഗോള മാതൃകകളുടെ അടിസ്ഥാനത്തിൽ ദേശീയ കർമപദ്ധതി ഇതിന്റെ ഭാഗമായി പുറത്തിറക്കും. മാരക രോഗങ്ങൾക്കിടയാക്കുന്ന കാരണങ്ങളെക്കുറിച്ച് രാജ്യത്തെ ജനങ്ങൾക്കിടയിൽ ബോധവത്കരണം നടത്തുകയാണ് ലക്ഷ്യം. ഇതിന്റെ ഭാഗമായി ഗവേഷണങ്ങളും പഠനങ്ങളും നടത്തുന്നതിനെ പ്രോത്സാഹിപ്പിക്കും.