ഒട്ടാവ: ആരോഗ്യപ്രശ്നങ്ങൾ തന്നെ അലട്ടുന്നുണ്ടെന്നും തനിക്ക് രാജിവെക്കേണ്ടി വന്നാൽ അതിൽ അസാധാരണമായി ഒന്നുമില്ലെന്നും വ്യക്തമാക്കി രംഗത്തെത്തിയിരിക്കുകയാണ് ഫ്രാൻസിസ് മാർപാപ്പ. കാനഡയിലെ ആറു ദിവസം നീണ്ട ഔദ്യോഗിക സന്ദർശനം പൂർത്തിയാക്കുന്ന വേളയിലാണ് മാർപാപ്പയുടെ വാക്കുകൾ. വീൽചെയറിലുള്ള യാത്ര സുഗമമായിരുന്നില്ലെന്ന സൂചന നൽകിയ മാർപാപ്പ തന്നെക്കൊണ്ട് കഴിയാവുന്നതിൻ്റെ പരമാവധിയാണ് ഇതെന്നും അദ്ദേഹം വ്യക്തമാക്കി.
മുട്ടിൻ്റെ ലിഗ്മെൻ്റുകൾക്ക് പ്രശ്നമുണ്ടെന്നും തന്നെക്കൊണ്ട് ഇത്തരത്തിൽ യാത്ര ചെയ്യാനാകില്ലെന്നും വിശ്രമം വേണ്ടി വന്നേക്കുമെന്നും മാർപാപ്പ വ്യക്തമാക്കി. താൻ രാജിവെക്കുന്നതിനെപ്പറ്റി ആലോചിച്ചിട്ടില്ലെന്നും എന്നാൽ ഒരു മാർപാപ്പയ്ക്ക് രാജിവെക്കേണ്ടി വന്നാൽ അതിൽ അസാധാരണമായി ഒന്നുമില്ലെന്നും ഫ്രാൻസിസ് മാർപാപ്പ വ്യക്തമാക്കി. "ഇതിൽ വിചിത്രമല്ല. ഇതൊരു ദുരന്തവുമല്ല. നിങ്ങൾക്ക് മാ‍ര്‍പാപ്പയെ മാറ്റാനാകും." വിമാനത്തിൽ വെച്ചു നടത്തിയ വാര്‍ത്താസമ്മേളനത്തിൽ മാര്പാപ്പ പറഞ്ഞു. രാജിവെക്കണമെന്ന് തീരുമാനിച്ചിട്ടില്ലെന്നും എന്നാൽ പൊതുപരിപാടികളിൽ നിന്നു വിട്ടുനിക്കേണ്ടി വരുമെന്നും അദ്ദേഹം കൂട്ടിച്ചേ‍ര്‍ത്തു.
ജോൺ പോള്‍ രണ്ടാമൻ മാര്‍പാപ്പയുടെ ആരോഗ്യനില വഷളായ കാലത്ത് സെൻ്റ് പീറ്റേഴ്സ് ചത്വരത്തിൽ തടിച്ചു കൂടിയ ജനാവലി മറക്കാവുന്ന കാഴ്ചയല്ല. എന്നാൽ രണ്ട് പതിറ്റാണ്ടിനിടെ ആഗോള കത്തോലിക്കാ സഭയുടെ മുഖം ഏറെ മാറിയിട്ടുണ്ട്. അതേസമയം, മാര്പാപ്പമാര് മരണം വരെ അധികാരത്തിൽ തുടരുക എന്നത് കത്തോലിക്കാ സഭയിൽ കേവലം ഒരു പതിവല്ല. വിശുദ്ധ പത്രോസിൻ്റെ പിൻഗാമി, ആഗോള ഇടയൻ എന്നിങ്ങനെയുള്ള വിശേഷണങ്ങൾക്ക് മാര്പാപ്പമാര് അര്‍ഹരാണ്. ഒരേ സമയം (സ്ഥാനമൊഴിഞ്ഞാലും ഇല്ലെങ്കിലും) ഒന്നിലധികം മാര്പാപ്പമാര് ജീവിച്ചിരിക്കുന്നത് ഈ പദവികൾക്ക് വലിയൊരു ഭീഷണിയാണ്.