കൊച്ചി: ആവോലി സുബ്രഹ്മണ്യ ക്ഷേത്രത്തിൽ നിന്ന് മോഷ്ടിച്ച വിഗ്രഹവുമായി തമിഴ്നാട് സ്വദേശികൾ സേലത്ത് പിടിയിൽ. അയപ്പ വിഗ്രഹവുമായി ഗൂഡല്ലൂർ അലാദിവിരുദാചലം ദക്ഷിണാമൂർത്തി, തിരുപ്പൂർ അരുൾപുരം വെങ്കിടേശ്വരൻ, അറിയാളൂർ കുന്ദവെളി പാണ്ട്യൻ എന്നിവരെയാണ് വാഴക്കുളം പോലീസ് പിടികൂടിയത്. മോഷ്ടിച്ച വിഗ്രഹത്തിൽ ചുംബിക്കുന്ന ചിത്രം ദക്ഷിണാമൂർത്തി സമൂഹമാധ്യമത്തിൽ സ്റ്റാറ്റസ് ആയി പോസ്റ്റ് ചെയ്തതാണ് പ്രതികളെ കണ്ടെത്താൻ പോലീസിനെ സഹായിച്ചത്. വിഗ്രഹം വിൽക്കാനുള്ള തയ്യാറെടുപ്പിലായിരുന്നു പ്രതികൾ. ദക്ഷിണാമൂർത്തി തന്നെയാണ് കേസിലെ പ്രധാന പ്രതി. ആവോലിയിലെ ഹോട്ടലിൽ താമസിക്കുകയായിരുന്ന ദക്ഷിണാമൂർത്തി ഒരു മാസം കൊണ്ടാണ് വിഗ്രഹ മോഷണം ആസൂത്രണം ചെയ്തതും നടപ്പിലാക്കിയതും. പഞ്ചലോഹ വിഗ്രഹമാണെന്ന് കരുതിയായിരുന്നു ഇയാൾ അയ്യപ്പ വിഗ്രഹം മോഷ്ടിച്ചത്. ക്ഷേത്രത്തിലെ ഉപദേവതയായ അയ്യപ്പ വിഗ്രഹം ശ്രീകോവിലിന് പുറത്ത് കാഞ്ഞിരമരച്ചുവട്ടിലാണ് പ്രതിഷ്ഠിച്ചിരുന്നത്. വിഗ്രഹവുമായി തമിഴ്നാട്ടിലേക്ക് കടന്ന ദക്ഷിണാമൂർത്തി മറ്റു രണ്ടുപേരുമായി ചേർന്ന് ആന്ധ്രപ്രദേശിലെ വ്യാപാരിക്ക് വിൽക്കാൻ ശ്രമിക്കുകയായിരുന്നു. വിഗ്രഹത്തിൽ ചുംബിക്കുന്ന ദക്ഷിണാമൂർത്തിയുടെ ചിത്രം കണ്ടതോടെ സിസിടിവിയുടെയും മൊബൈൽ ഫോൺ ലൊക്കേഷന്‍റെയും സഹായത്തോടെയാണ് പ്രതികളെ പോലീസ് കണ്ടെത്തിയതും അറസ്റ്റ് ചെയ്തതും.