പത്തനംതിട്ട: വനാതിർത്തികൾ കടന്ന് വന്യജീവികൾ ജനവാസ മേഖലകളിലേക്ക് എത്തി നാശം വിതക്കുന്നത് കൂടുന്നു. കാട്ടുപന്നി,കാട്ടാന തുടങ്ങിയവക്ക് പുറമെ പുലിയും കടുവയും ഇപ്പോൾ കർഷകർക്ക് വിനയാവുകയാണ്. കോടമലയിൽ കടുവ ഇറങ്ങി തോട്ടത്തിൽ മേയുകയായിരുന്ന പോത്തിനെ പട്ടാപ്പകൽ കൊന്നു. കണ്ടു നിന്നവർ ബഹളം കൂട്ടിയതോടെ കടുവ മടങ്ങി. മണിമല സ്വദേശി ആൽബിൻ സെബാസ്റ്റ്യന്റെ ഉടമസ്ഥതയിലുള്ള പോത്തിനെയാണ് കടുവ പിടിച്ചത്.റാന്നി വനം ഡിവിഷൻ പരിധിയിൽ ഉൾപ്പെടുന്ന പ്രദേശമാണ് മലയാലപ്പുഴ കോടമല. പുലർച്ചെ റബർ ടാപ്പിങ്ങിനെത്തിയ തൊഴിലാളികളായ സുമംഗല, അനിൽ എന്നിവരാണ് പോത്തിനെ കടുവ ആക്രമിക്കുന്നത് കണ്ടത്. അവർ ബഹളം ഉണ്ടാക്കിയതോടെ കടുവ പോത്തിനെ ഉപേക്ഷിച്ച് കാട്ടിലേക്ക് കയറി. കടുവയെ കണ്ട സ്ഥലത്തിനടുത്തായി നിരവധി വീടുകളും താമസക്കാരുമുണ്ട്. തണ്ണിത്തോട് ഫോറസ്റ്റ് സ്റ്റേഷന്റെ പരിധിയിലാണ് കോടമല പ്രദേശം. ഡപ്യൂട്ടി റേഞ്ചർ എസ്. രജികുമാറിന്റെ നേതൃത്വത്തിൽ വനപാലകർ സ്ഥലത്ത് എത്തി പരിശോധനകൾ നടത്തി. പോത്തിനെ ആക്രമിച്ചത് കടുവ തന്നെയാണെന്ന് ഇവർ സ്ഥിരീകരിക്കുകയും ചെയ്തു. തണ്ണിത്തോട് വെറ്ററിനറി സർജൻ ഡോ.വിജി വിജയന്റെ നേതൃത്വത്തിൽ പോത്തിന്റെ ജഡം പോസ്റ്റ്മോർട്ടം നടത്തിയ ശേഷം മറവു ചെയ്തു. വനംവകുപ്പിന്റെ ദ്രുതകർമ സേനയും തണ്ണിത്തോട് സ്റ്റേഷനിലെ വനപാലകരും ഉൾപ്പെടുന്ന സംഘം പ്രദേശത്ത് നിരീക്ഷണം ശക്തമാക്കിയിട്ടുണ്ട്. കടുവ വനത്തിൽ തന്നെ ഉള്ളതായാണ് സൂചന. രണ്ട് വർഷം മുൻപ് തണ്ണിത്തോട് സ്റ്റേഷന്റെ പരിധിയിലെ മേടപ്പാറയിൽ കടുവയുടെ ആക്രമണത്തിൽ ടാപ്പിങ് തൊഴിലാളി കൊല്ലപ്പെട്ടിരുന്നു.കാട്ടാന പകലും രാത്രിയിലും ഈ പ്രദേശങ്ങളിൽ വലിയ നാശമാണ് ഉണ്ടാക്കികൊണ്ടിരിക്കുന്നത്. കൃഷിയ്ക്ക് പുറമെ വലിയ തെങ്ങുകൾ വരെ ഇവ നശിപ്പിക്കുകയാണ്. ഈ പ്രദേശങ്ങളിൽ പന്നി ശല്യവും രൂക്ഷമാണ്.