തിരുവനന്തപുരം: തീവ്രവാദ കേസിൽ ഒളിവിൽ കഴിയുന്ന പോപ്പുലർ ഫ്രണ്ട് നേതാക്കൾക്കായി ലുക്ക് ഔട്ട് നോട്ടീസ് പുറപ്പെടുവിക്കാൻ നീക്കം ശക്തമാക്കി എൻഐഎ. സംസ്ഥാന ജനറൽ സെക്രട്ടറി അബ്ദുൾ സത്താർ, സെക്രട്ടറി സി എ റൗഫ് എന്നിവർക്കെതിരെയാണ് നീക്കം. ലുക്ക് ഔട്ട് നോട്ടീസ് പുറപ്പെടുവിക്കുന്നതുമായി ബന്ധപ്പെട്ട് എൻഐഎ കോടതിയിൽ ഹർജി നൽകും. എൻഐഎ കേരളത്തിൽ റെയ്ഡ് നടത്തുന്നതിനിടെ ഒളിവിൽ പോയവരാണ് സത്താറും റൗഫും. റെയ്ഡിൽ പ്രതിഷേധിച്ച് ഹർത്താലിന് ആഹ്വാനം ചെയ്തത് ഇവരാണ്. ഒളിവിൽ കഴിയുന്നതിനിടെ സംഘടന പ്രവർത്തനം നടത്തുമെന്ന സൂചനകൾ ലഭിച്ചതും ഇവർ രാജ്യം വിടാനുള്ള സാഹചര്യവും കണക്കിലെടുത്താണ് എൻഐഎ നീക്കം. രാജ്യം വിടാൻ സാധ്യതയുള്ളതിനാൽ സത്താറിനെയും റൗഫിനെയും പിടികൂടേണ്ടത് അത്യാവശ്യമാണെന്ന് എൻഐഎ കോടതിയെ അറിയിക്കും. രാജ്യ വിരുദ്ധ പ്രവർത്തനങ്ങൾക്ക് ഗൂഢാലോചന നടത്തി, സമൂഹമാധ്യമങ്ങൾ ഉപയോഗിച്ച് ആളുകളെ ഭീകര സംഘടനകളിലേക്ക് ആകർഷിച്ചു എന്നീ കാര്യങ്ങളിൽ ഇവർക്ക് പങ്കുണ്ടെന്നാണ് എൻഐഎ വ്യക്തമാക്കുന്നത്. തീവ്രവാദ കേസുകളുമായി ബന്ധപ്പെട്ട് കേരളത്തിൽ രജിസ്റ്റർ ചെയ്ത കേസിലെ മൂന്നാം പ്രതിയാണ് അബ്ദുൾ സത്താർ. പന്ത്രണ്ടാം പ്രതിയാണ് സി എ റൗഫ്.