കൊല്ലം: 14 കാരിയെ കടുത്ത ലഹരി വസ്തു ഉപയോഗിച്ച് ബോധരഹിതയായി കണ്ടെത്തി.കൊല്ലം അഞ്ചൽ പാണയം ലക്ഷംവീട് കോളനിയിലാണ് സംഭവം നടന്നത്. അബോധാവസ്ഥയിലായ പെൺകുട്ടി പുനലൂർ താലൂക്ക് ആശുപത്രിയിൽ ചികിത്സയിലാണ്. ഇതുവരെ ബോധം തെളിഞ്ഞിട്ടില്ല. സംഭവത്തിൽ ഏരൂർ പോലീസ് അന്വേഷണം ആരംഭിച്ചു. കഴിഞ്ഞ മാസം 28ന് ഓണത്തോട് അനുബന്ധിച്ച് വീടിന് സമീപത്ത് കലാപരിപാടികൾ നടന്നിരുന്നു. ഇതിനിടെ രാത്രി 10 മണിയോടെ കുട്ടിയുടെ വീടിന്‍റെ മുന്നിൽ യുവാക്കൾ ഉൾപ്പടെ ഉണ്ടായിരുന്ന ഒരു കാർ വന്ന് പോയതായി നാട്ടുകാർ പറഞ്ഞു. അതിന് ശേഷം പെൺകുട്ടിയെ കാണാനില്ലെന്ന് കാണിച്ച് ബന്ധുക്കൾ പോലീസിൽ പരാതി നൽകി. രാത്രി വൈകിയും കുട്ടിയെ കാണാത്തതിനെ തുടർന്ന് അയൽവാസികളും നാട്ടുകാരും തിരച്ചിൽ നടത്തി. എന്നാൽ ഈ സമയം കുട്ടി കടുത്ത ഏതോ ലഹരിവസ്തുക്കൾ ഉപയോഗിച്ച് വീടിന്‍റെ പരിസരത്ത് തന്നെ ബോധരഹിതമായി കിടക്കുകയായിരുന്നു. അതിനാൽ, തെരച്ചിൽ നടത്തിയ ആരുടെയും ശ്രദ്ധയിൽ കുട്ടി പെട്ടില്ല. ഏറെ വൈകിയാണ് കുട്ടിയെ കണ്ടെത്തിയത്. സംഭവത്തിൽ കുട്ടിയുടെ മാതാവിന് പങ്കുണ്ടെന്നാണ് നാട്ടുകാരും ബന്ധുക്കളും ആരോപിക്കുന്നത്. എന്താണ് യഥാർത്ഥത്തിൽ സംഭവിച്ചതെന്നും ഇത് വരെ വ്യക്തമല്ല. കുട്ടിയുടെ ചെള്ളയിൽ കടിയേറ്റ പാടുള്ളതായും നാട്ടുകാർ പറഞ്ഞു. സംഭവത്തിൽ അന്വേഷണം നടത്തി കുറ്റക്കാർക്കെതിരെ നിയമനടപടി സ്വീകരിക്കണമെന്നാണ് നാട്ടുകാരുടെ ആവശ്യം.