ഈ മാസം പതിനൊന്നിനായിരുന്നു സംഭവം. അതിയന്നൂർ കമുകിൻകോട് ഒറ്റപ്ലാവില വീട്ടിൽ അനീഷ് (25), അരംഗമുകൾ മേലേവീട്ടിൽ നിഖിൽ (21) എന്നിവരെ പോലീസ് അറസ്റ്റു ചെയ്തിരുന്നു. പ്രതികൾക്കെതിരെ വധശ്രമക്കുറ്റമാണ് ചുമത്തിയിരുന്നത്. എന്നാൽ വിജയകുമാരി മരിച്ചതോടെ പ്രതികൾക്കെതിരെ കൊലക്കുറ്റം ചുമത്തും. പ്രതികളിപ്പോൾ പൂജപ്പുര സെൻട്രൽ ജയിലിൽ റിമാൻഡിൽ കഴിയുകയാണ്.
അടുത്തിടെയാണ് വിജയകുമാരിയുടെ വീടിനു സമീപത്തെ ഭൂമി അനീഷ് വാങ്ങിയത്. ഈ സ്ഥലത്തിൻ്റെ അതിർത്തി സംബന്ധിച്ചു തർക്കം ഉണ്ടായിരുന്നു. അനീഷിനു വീടു നിർമിക്കുന്നതിൻ്റ ഭാഗമായി വസ്തു മണ്ണുമാന്തി ഉപയോഗിച്ചു വൃത്തിയാക്കുന്നതിനിടെ ഇരുവരും തമ്മിൽ വാക്കേറ്റമുണ്ടായി. റബ്ബർ കമ്പ് കൊണ്ട് വിജയകുമാരിയുടെ കഴുത്തിലാണ് പ്രതികൾ കുത്തിയത്.
മകളും പോളിടെക്നിക്ക് വിദ്യാർഥിനിയുമായ ശിവകലയാണ് നിലവിളിച്ച് ആളെക്കൂട്ടി മാതാവിനെ ആശുപത്രിയിലെത്തിച്ചത്. കഴുത്തിൽ മാരകമായി മുറിവേറ്റ വിജയകുമാരിയെ അന്നുതന്നെ അടിയന്തര ശസ്ത്രക്രിയയ്ക്കു വിധേയയാക്കിയിരുന്നു. അത്യാസന്ന നിലയിലായതിനാൽ ഉടൻ തന്നെ വെൻ്റിലേറ്ററിലേക്ക് മാറ്റി. കഴിഞ്ഞ നാലു ദിവസമായി വെൻ്റിലേറ്ററിലായിരുന്നു. ഇന്നാണ് മരണം സംഭവിച്ചത്.