കൊല്ലം: ജീവിതം മാറ്റിമറിക്കാൻ ഒരു നിമിഷം മതി, കൊല്ലം മൈനാഗപ്പള്ളിയിലെ പൂക്കുഞ്ഞിൻ്റെ ജീവിതത്തിലും സംഭവിച്ചത് അതുതന്നെ. എല്ലാം നഷ്ടപ്പെട്ടെന്ന് ഓർത്ത് തലയിൽ കൈവെച്ചിരിക്കുമ്പോൾ ഒന്നാം സമ്മാനം നൽകി ഭാഗ്യദേവതയുടെ കടാക്ഷം. മീൻ വിൽപ്പനക്കാരനായ പൂക്കുഞ്ഞിന് ഇപ്പോഴും അമ്പരപ്പാണ്. മൈനാഗപ്പള്ളി ഷാനവാസ് മൻസിലിലെ പൂക്കുഞ്ഞി (40) ൻ്റെ ജീവിതം മാറ്റിമറിച്ച ദിവസമായിരുന്നു ബുധനാഴ്ച. ബൈക്കിൽ മീൻ വീറ്റാണ് പൂക്കുഞ്ഞ് കുടുംബം പോറ്റുന്നത്. ഇന്നലെ മീൻ വിൽപ്പന കഴിഞ്ഞുവരുന്നതിനിടെ മൈനാഗപ്പള്ളി പ്ലാമൂട്ടിൽ ചന്തയിൽ നിന്ന് ലോട്ടറിയെടുത്തു. ശേഷം നേരെ വീട്ടിലേക്ക്. ഒരു മണിക്കൂറിനു ശേഷം വിധിയുടെ രൂപത്തിൽ പൂക്കുഞ്ഞിനെ തേടിയെത്തിയത് ജപ്തി നോട്ടീസായിരുന്നു. വീട് നിർമാണത്തിനായി കരുനാഗപ്പള്ളി കുറ്റിവട്ടത്തെ കോർപറേഷൻ ബാങ്ക് ശാഖയിൽ നിന്ന് 7.45 ലക്ഷം രൂപ വായ്പ എടുത്തിരുന്നു. കുടിശിക ഒൻപതു ലക്ഷത്തിൽ എത്തി നിന്നതോടെ ജപ്തി ഭീഷണിയിലായിരുന്നു കുടുംബം. ഒടുവിലാണ് ബാങ്ക് അയച്ച ജപ്തി നോട്ടീസ് ഉച്ചയ്ക്ക് 12 മണിയോടെ പൂക്കുഞ്ഞ് കൈപ്പറ്റുന്നത്. ജപ്തി നോട്ടീസ് ലഭിച്ചതോടെ പൂക്കുഞ്ഞിന് നെഞ്ചിടിപ്പേറി. എന്തു ചെയ്യണമെന്ന് അറിയാതെ പൂക്കുഞ്ഞും കുടുംബവും പകച്ചു നിൽക്കുമ്പോഴാണ് മൂന്നുമണിയോടെ സഹോദരൻ്റെ വിളിയെത്തുന്നത്. രാവിലെ എടുത്ത അക്ഷയ ഭാഗ്യക്കുറിക്ക് ഒന്നാം സമ്മാനം ലഭിച്ചുവെന്ന് സഹോദരൻ അറിയിച്ചെങ്കിലും പൂക്കുഞ്ഞിന് വിശ്വാസം വന്നില്ല. തൻ്റെ കയ്യിലുള്ള എ.ഇസഡ് 907042 ടിക്കറ്റ് ഒന്നു കൂടി ഒത്തുനോക്കിയപ്പോഴാണ് ഒന്നാം സമ്മാനമായ 70 ലക്ഷം രൂപ തനിക്കാണ് ലഭിച്ചതെന്ന് ബോധ്യപ്പെടുന്നത്. ലോട്ടറി എടുക്കുന്ന പതിവില്ലാത്ത തനിക്ക് ലോട്ടറി അടിച്ചതിൻ്റെ അമ്പരപ്പിലാണ് പൂക്കുഞ്ഞ്. മുംതാസ് ആണ് പൂക്കിഞ്ഞിൻ്റെ ഭാര്യ. മുനീർ, മുഹ്സിന എന്നിവർ മക്കളാണ്.