തിരുവനന്തപുരം: വിഴിഞ്ഞം തുറമുഖത്തിനെതിരെ ലത്തീന്‍ അതിരൂപതയുടെ നേതൃത്വത്തില്‍ നടക്കുന്ന മത്സ്യത്തൊഴിലാളികളുടെ സമരത്തിന്‍റെ നൂറാം ദിനമായ ഇന്ന് പ്രതിഷേധം കത്തുന്നു. കടലില്‍ വള്ളം കത്തിച്ച് പ്രതിഷേധിച്ച മത്സ്യത്തൊഴിലാളികള്‍ പോലീസ് ബാരിക്കേഡുകള്‍ കടലിലെറിഞ്ഞു. പ്രതിഷേധം കണക്കിലെടുത്ത് വിഴിഞ്ഞം തുറമുഖത്തിന് മുന്നിലെ സമരപ്പന്തലിന് സമീപം വന്‍ പോലീസ് സന്നാഹമാണ് വിന്യസിപ്പിച്ചിരിക്കുന്നത്. നൂറാം ദിവസത്തില്‍ കടലിലും കരയിലും ഒരേ സമയത്താണ് മത്സ്യത്തൊഴിലാളികള്‍ സമരം സംഘടിപ്പിച്ചത്. മുല്ലൂര്‍ കവാടം, വിഴിഞ്ഞം കവാടം, മുതലപ്പൊഴി എന്നിവിടങ്ങളിലാണ് പ്രതിഷേധം നടന്നത്. രാവിലെ 8.30 മുതല്‍ ഓരോ ഇടവകകളില്‍നിന്നും ബൈക്കുകളിലും ഓട്ടോകളിലും പ്രതിഷേധക്കാര്‍ മുല്ലൂരിലെ സമരപന്തലിലെത്തി. പിന്നീട് വിഴിഞ്ഞം തുറമുഖത്തിന്‍റെ മുല്ലൂരിലെ പ്രധാന കവാടത്തിന്‍റെ പൂട്ട് തകര്‍ത്ത പ്രതിഷേധക്കാര്‍, പദ്ധതി പ്രദേശത്തേയ്ക്കു കടന്നു. കടലിലൂടെ വള്ളങ്ങളിലെത്തിയ മത്സ്യത്തൊഴിലാളികള്‍ പദ്ധതി പ്രദേശത്ത് പ്രതിഷേധിച്ചു. പ്രതിഷേധ സൂചകമായി വള്ളങ്ങളും കത്തിച്ചു. പോലീസ് സ്ഥാപിച്ചിരുന്ന ബാരിക്കേഡുകള്‍ കടലിലേക്കു തള്ളി.
കേരളത്തിന്‍റെ സമര ചരിത്രത്തില്‍ ഇതുവരെ കാണാത്ത പ്രതിഷേധ സമരമാണ് വിഴിഞ്ഞത്ത് അരങ്ങേറുന്നത്. മുതലപ്പൊഴിയില്‍ നിന്ന് നൂറു കണക്കിനു വള്ളങ്ങള്‍ കടല്‍മാര്‍ഗം പോര്‍ട്ടിനടുത്തെത്തി. പുതുകുറിച്ചി, അഞ്ചുതെങ്ങ് ഫൊറോനകളുടെ നേതൃത്വത്തിലാണ് സമരം. സമരം വിജയിപ്പിക്കാന്‍ എല്ലാവരും സഹകരിക്കണമെന്ന് ആര്‍ച്ച് ബിഷപ്പ് സര്‍ക്കുലറിലൂടെ ആഹ്വാനം ചെയ്തിരുന്നു. ഏഴ് ആവശ്യങ്ങള്‍ ഉന്നയിച്ചാണ് ലത്തീന്‍ അതിരൂപതയുടെ നേതൃത്വത്തിലുള്ള സമരസമിതി ജൂലൈ 20 മുതല്‍ സമരം നടത്തുന്നത്. തുറമുഖ നിര്‍മാണം നിര്‍ത്തിവച്ച് തീരശോഷണത്തെക്കുറിച്ച് പഠിക്കണമെന്ന ആവശ്യമൊഴികെ മറ്റു ആറു ആവശ്യങ്ങള്‍ സര്‍ക്കാര്‍ അംഗീകരിച്ചിരുന്നു. തുറമുഖ നിര്‍മാണം നിര്‍ത്തിവച്ച് പഠനം നടത്തണമെന്ന ആവശ്യത്തില്‍ പ്രതിഷേധക്കാര്‍ ഉറച്ചു നില്‍ക്കുകയാണ്. മത്സ്യത്തൊഴിലാളി പ്രതിനിധികളെ സര്‍ക്കാര്‍ രൂപീകരിച്ച പഠന സമിതിയില്‍ ഉള്‍പ്പെടുത്തണമെന്നും പ്രതിഷേധക്കാര്‍ ആവശ്യപ്പെടുന്നു. വാടക വീടുകളില്‍ കഴിയുന്നവര്‍ക്ക് സര്‍ക്കാര്‍ നല്‍കുന്ന തുക അപര്യാപ്തമാണെന്നും പ്രതിഷേധക്കാര്‍ വാദിക്കുന്നു.