ദുബായ്: ഗള്‍ഫ് കോഓപ്പറേഷന്‍ കൗണ്‍സില്‍ അഥവാ ജിസിസി രാജ്യങ്ങളിലെ പൗരന്‍മാര്‍ക്ക് യുഎഇയിലേക്ക് വരാന്‍ വിസ ആവശ്യമില്ല. അതേപോലെ 70 രാജ്യക്കാര്‍ക്ക് മുന്‍കൂട്ടി വിസ എടുക്കാതെ യുഎഇയിലേക്ക് വരാന്‍ കഴിയും. യുഎഇ വിമാനത്താവളത്തില്‍ എത്തിയ ശേഷം ഓണ്‍ അറൈവല്‍ വിസ എടുത്താല്‍ മതിയാകും. എന്നാല്‍ ഓണ്‍ അറൈവല്‍ വിസ അനുവ ദിക്കപ്പെടുന്ന 70 രാജ്യങ്ങളുടെ കൂട്ടത്തില്‍ ഇന്ത്യ ഉള്‍പ്പെട്ടിട്ടില്ല. അതുകൊണ്ടു തന്നെ സാധാരണ ഇന്ത്യന്‍ പാസ്‌പോര്‍ട്ട് കൈവശമുള്ളവര്‍ക്ക് ഓണ്‍ അറൈവല്‍ വിസ ലഭിക്കുകയുമില്ല.ഇങ്ങനെയൊക്കെയാണ് കാര്യങ്ങളെങ്കിലും നാല് സന്ദര്‍ഭങ്ങളില്‍ ഇന്ത്യക്കാര്‍ക്ക് യുഎഇയില്‍ ഓണ്‍ അറൈവല്‍ വിസ ലഭിക്കാന്‍ അര്‍ഹത ഉണ്ടായിരിക്കും. അമേരിക്കയില്‍ നിന്ന് ഇഷ്യൂ ചെയ്യപ്പെട്ട വിസിറ്റ് വിസ ഉള്ള ഇന്ത്യക്കാരാണ് അവരില്‍ ഒരു വിഭാഗം. അല്ലെങ്കില്‍ അമേരിക്കയില്‍ നിന്നുള്ള ഗ്രീന്‍ കാര്‍ഡ് വേണം. ബ്രട്ടനില്‍ താമസ വിസയുള്ളവരും യൂറോപ്യന്‍ യൂനിയന്‍ അംഗ രാജ്യങ്ങളില്‍ താമസ വിസയുള്ളവരുമാണ് യുഎഇയില്‍ ഓണ്‍ അറൈവല്‍ വിസ ലഭിക്കുന്ന മറ്റു രണ്ടു വിഭാഗം ഇന്ത്യക്കാര്‍.അമേരിക്കന്‍ ഗ്രീന്‍ കാര്‍ഡും, അമേരിക്ക, ബ്രിട്ടന്‍, യൂറോപ്യന്‍ യൂനിയന്‍ എന്നിവിടങ്ങളില്‍ നിന്നുള്ള വിസയും ആറു മാസത്തെ കാലാവധി ഉള്ളവയായിരിക്കണം എന്ന നിബന്ധനയുണ്ട്. എഇയില്‍ എത്തിയതു മുതലാണ് ആറു മാസത്തെ കാലാവധി കണക്കാക്കുക. അതേപോലെ ഇന്ത്യന്‍ പാസ്‌പോര്‍ട്ടും ആറു മാസത്തെ കാലാവധി ഉള്ളവയായിരിക്കണം. ഈ നാലു വിഭാഗക്കാര്‍ക്ക് യുഎഇയില്‍ വരുന്നതിന് മുമ്പ് വിസ എടുക്കല്‍ നിര്‍ബന്ധമില്ല. യുഎഇയില്‍ എത്തിയതിനു ശേഷം ഓണ്‍ അറൈവല്‍ വിസയ്ക്ക് അപേക്ഷ നല്‍കിയാല്‍ മതിയാകും. ഇങ്ങനെ എടുക്കുന്ന വിസകള്‍ക്ക് 14 ദിവസത്തെ കാലാവധിയായിരിക്കും ലഭിക്കുക. 14 ദിവസം കഴിയുന്ന മുറയ്ക്ക് മറ്റൊരു 14 ദിവസത്തേക്ക് കൂടി വിസാ കാലാവധി നീട്ടാനും അവസരം ലഭിക്കും.വെബ്‌സൈറ്റില്‍ ലഭ്യമായ വിവരങ്ങള്‍ അനുസരിച്ച് 14 ദിവസത്തെ ഓണ്‍ അറൈവല്‍ വിസയ്ക്ക് 120 ദിര്‍ഹമാണ് ഫീസായി നല്‍കേണ്ടത്. എന്നാല്‍ 14 ദിവനവസത്തേക്കു കൂടി കാലാവധി നീട്ടാന്‍ 250 ദിര്‍ഹം കൂടി നല്‍കണം. എന്നാല്‍ 28 ദിവസത്തില്‍ കൂടുതല്‍ യുഎഇയില്‍ തങ്ങണം എന്നുള്ളവര്‍ മറ്റേതെങ്കിലും വിസയ്ക്കായി അപേക്ഷ നല്‍കേണ്ടിവരും. 90 ദിവസം വരെ കാലാവധിയുള്ളവയാണ് ഈ വിസകള്‍. അഞ്ചു വര്‍ഷത്തേക്ക് കാലാവധിയുള്ള മള്‍ട്ടി എന്‍ട്രി ടൂറിസ്റ്റ് വിസയും ഇപ്പോള്‍ ലഭ്യമാണ്. ഈ വിസയുള്ളവര്‍ക്ക് ഒരു വരവില്‍ 90 ദിവസം വരെ തുടര്‍ച്ചയായി യുഎഇയില്‍ താമസിക്കാം. വീണ്ടും ഒരു 90 ദിവസത്തേക്കു കൂടി നീട്ടാനും അവസരമുണ്ടായിരിക്കും. ഒരു വര്‍ഷത്തിനിടയില്‍ 180 ദിവസത്തില്‍ കൂടുതല്‍ താമസിക്കാന്‍ പാടില്ലെന്ന നിബന്ധനയുണ്ട്. ഇതിനു വേണ്ടി അപേക്ഷ നല്‍കുന്നതിന് മുമ്പുള്ള ആറു മാസം ചുരുങ്ങിയത് 4000 യുഎസ് ഡോളറോ തത്തുല്യമായ കറന്‍സിയോ ബാങ്ക് ബാലന്‍സ് വേണം എന്ന നിബന്ധനയുണ്ട്.