ദുബായ്: ദുബായിലെ മണി കിക്ക്‌സ് എന്ന പേരില്‍ പ്രശസ്തനായ സോഷ്യല്‍ മീഡിയ താരം റാശിദ് ബെല്‍ഹസയെ ലണ്ടന്‍ നഗരത്തില്‍ വച്ച് തട്ടിക്കൊണ്ടു പോവാന്‍ മുഖം മൂടി ധാരികളായ അജ്ഞാത സംഘം ശ്രമം നടത്തിയതായി റിപ്പോര്‍ട്ട്. അക്രമി സംഘത്തില്‍ നിന്ന് ഭാഗ്യം കൊണ്ടാണ് താന്‍ രക്ഷപ്പെട്ടതെന്നും 20കാരനായ സോഷ്യല്‍ മീഡിയ താരം പറഞ്ഞു. ലണ്ടന്‍ സന്ദര്‍ശനത്തിന് എത്തിയ വേളയിലായിരുന്നു സംഭവം. ഒരു യൂട്യൂബ് പോസ്റ്റിലൂടെ താരം തന്നെയാണ് ഇക്കാര്യം വ്യക്തമാക്കിയത്. ഇന്‍സ്റ്റഗ്രാമിര്‍ 20 ലക്ഷത്തിലേറെ ഫോളോവേഴ്‌സുള്ള താരമാണ് റാശിദ്. ലണ്ടനിലെത്തിയ ആദ്യ രണ്ടു ദിവസങ്ങളില്‍ കാര്യങ്ങളൊക്കെ സന്തോഷകരമായിരുന്നുവെന്ന് റാശിദ് പറഞ്ഞു. അതിനിടെ, ഒരു ഫോണ്‍ കോള്‍ വന്നു. റാശിദിന്റെ തലയ്ക്ക് 20 ലക്ഷം ഡോളര്‍ വില ഇട്ടിട്ടുണ്ടെന്നായിരുന്നു ഫോണ്‍ വഴിയുള്ള സന്ദേശം. അതിനു ശേഷം അതീവ ശ്രദ്ധയോടെയായിരുന്നു തന്റെ എല്ലാ നീക്കങ്ങളുമെന്ന് സുരക്ഷാ ഉദ്യോഗസ്ഥര്‍ ഉള്‍പ്പെടെയുള്ള സംഘത്തോടൊപ്പം ലണ്ടനിലെത്തിയ അദ്ദേഹം പറഞ്ഞു. രഹസ്യമായിട്ടായിരുന്നു പിന്നീടുള്ള യാത്രകള്‍. എന്നാല്‍ അതിനിടെ ഒരു തവണ തനിക്ക് അബദ്ധം പിണഞ്ഞു. സോഷ്യല്‍ മീഡിയയില്‍ അബദ്ധത്തില്‍ ലൊക്കേഷന്‍ ഷെയര്‍ ചെയ്തതാണ് പ്രശ്‌നമായത്. തങ്ങള്‍ എവിടെയാണ് ഉള്ളതെന്ന് അറിയാതിരിക്കാന്‍ ആരും ലൊക്കേഷന്‍ ഷെയര്‍ ചെയ്യരുതെന്ന് സംഘത്തിലെ മറ്റുള്ളവര്‍ക്കെല്ലാം താന്‍ നിര്‍ദ്ദേശം നല്‍കിയിരുന്നുവെങ്കിലും തന്റെ പക്കല്‍ നിന്നു തന്നെ ഇക്കാര്യത്തില്‍ വീഴ്ച സംഭവിക്കുകയായിരുന്നുവെന്നും അദ്ദേഹം പറഞ്ഞു. ഒരു ഹോട്ടലിലെത്തിയ താന്‍ ഇന്‍സ്റ്റഗ്രാമില്‍ ഒരു ചിത്രം പോസ്റ്റ് ചെയ്തതാണ് പ്രശ്‌നമായത്. അവിടെ നിന്ന് പുറത്തിറങ്ങിയ തന്റെ വാഹനത്തെ ഏതാനും പേര്‍ പിന്തുടരുന്നുണ്ടായിരുന്നു. തന്റെ ആരാധകരാണെന്നായിരുന്നു അവര്‍ പരിചയപ്പെടുത്തിയത്. എന്നാല്‍ സുരക്ഷാ ജീവനക്കാര്‍ ഇവരെ നിരീക്ഷിക്കുന്നുണ്ടായിരുന്നു. രണ്ട് കാറിലായി സഞ്ചരിച്ച മുഖം മൂടി സംഘം പെട്ടെന്ന് തന്റെ വാഹനം തടയാന്‍ ശ്രമിച്ചു. എന്നാല്‍ സുരക്ഷാ ജീവനക്കാര്‍ അവരുടെ വാഹനം അക്രമികളുടെ വാഹനത്തിന് കുറുകെയിട്ട് ബ്ലോക്ക് ചെയ്തത് കൊണ്ടു മാത്രമാണ് തനിക്ക് അവിടെ നിന്ന് രക്ഷപ്പെടാനായതെന്നും അദ്ദേഹം പറഞ്ഞു.
ലണ്ടനിലേക്ക് സന്ദര്‍ശനത്തിന് വരുന്ന മധ്യപൗരസ്ത്യ ദേശത്തെ ആളുകള്‍ക്ക് ഒരു പാഠമാവട്ടെ എന്നു കരുതിയാണ് ഈ വീഡിയോ പോസ്റ്റര്‍ ചെയ്തതെന്നും അദ്ദേഹം വ്യക്തമാക്കി. ലണ്ടന്‍ മനോഹരമായ നഗരമാണ്. അതിനെ ഞാന്‍ ഏറെ ഇഷ്ടപ്പെടുന്നു. എന്നാല്‍ ഇവിടത്തെ ജനങ്ങള്‍ എല്ലാവരും നല്ലവരല്ല. അതിനാല്‍ ജാഗ്രത കൈവിടരുത്. നിങ്ങള്‍ എവിടെയാണോ ഉള്ളത് അവിടെ നിന്ന് സോഷ്യല്‍ മീഡിയ അക്കൗണ്ടുകളില്‍ ഫോട്ടോകള്‍ പോസ്റ്റ് ചെയ്യരുതെന്നും അദ്ദേഹം ഉപദേശിച്ചു. തന്നോടൊപ്പം നല്ലൊരു സംഘം ഉണ്ടായതു കൊണ്ടുമാത്രമാണ് താന്‍ രക്ഷപ്പെട്ടത്. തന്റെ നാടായ ദുബായില്‍ ഇത്തരമൊരു ദുരനുഭവം ഒരുക്കലും ഉണ്ടായിട്ടില്ല. നാടിന്റെ ഭരണാധികാരികള്‍ക്കാണ് അതിന് നന്ദി പറയേണ്ടത്. ഇതുപോലെ ഒരു രാജ്യത്ത് ജീവിക്കാന്‍ കഴിയുക എന്നതു തന്നെ വലിയ അനുഗ്രഹമാണ്. നാട്ടില്‍ തിരികെ വിമാനം ഇറങ്ങിയപ്പോള്‍ ഏറെ സുരക്ഷിതത്വം പ്രദാനം ചെയ്യുന്ന ഇവിടത്തെ മണ്ണ് ചുംബിക്കണമെന്നാണു തോന്നിയതെന്നും അദ്ദേഹം പറഞ്ഞു.