ദുബായ്: ചന്ദ്രനില് പുതിയ ചരിത്രം രചിക്കാന് യുഎഇ. ചാന്ദ്ര ദൗത്യമായ റാശിദ് റോവര് വിക്ഷേപണത്തിന് തയ്യാറായതായി ദുബായ് കിരീടാവകാശിയും എക്സിക്യൂട്ടീവ് കൗണ്സില് ചെയര്മാനുമായ ശെയ്ഖ് ഹംദാന് ബിന് മുഹമ്മദ് ബിന് റാശിദ് അല് മക്തൂം അറിയിച്ചു. ഇതിനു മുന്നോടിയായി ആവശ്യമായ പരിശോധനകളെല്ലാം ബഹിരാകാശ പേടകമായ റാശിദ് റോവര് വിജയകരമായി പൂര്ത്തിയാക്കിയതായും അദ്ദേഹം പറഞ്ഞു. നവംബര് ഒമ്പതിനും 15നും ഇടയിലായിരിക്കും റാശിദ് റോവറിന്റെ വിക്ഷേപണം. ചാന്ദ്ര ദൗത്യത്തില് ഏര്പ്പെടുന്ന ആദ്യ അറബ് രാജ്യമെന്ന ഖ്യാതി ഇതോടെ യുഎഇക്ക് സ്വന്തമാകും. ദുബായ് സ്ഥാപക ഭരണാധികാരിയായ ശെയ്ഖ് റാശിദ് ബിന് സഈദ് അല് മക്തൂമിന്റെ പേരിനോട് ചേര്ത്താണ് ഈ ചാന്ദ്ര പേടകത്തിന് റാശിദ് റോവര് എന്നു പേരിട്ടിരിക്കുന്നത്. ആര്ട്ടിഫിഷ്യല് ഇന്റലിജന്സ് സാങ്കേതിക വിദ്യയുടെ സഹായത്തോടെ പ്രവര്ത്തിക്കുന്ന റാശിദ് റോവര്, ഫ്ളോറിഡയിലെ കെന്നഡി സ്പേസ് സെന്ററില് നിന്നാണ് ചന്ദ്രനിലേക്ക് കുതിക്കുക. അടുത്ത മാസം ആദ്യവാരം വിക്ഷേപണത്തിന്റെ കൃത്യമായ തിയ്യതി പ്രഖ്യാപിക്കും. രാജ്യത്തിന്റെ ദീര്ഘകാല ചാന്ദ്ര പര്യവേക്ഷണ പദ്ധതിക്ക് കീഴിലെ ആദ്യ ദൗത്യമാണിത്. ഹകുട്ടോ-ആര് മിഷന്-1 എന്ന ജാപ്പനീസ് ലാന്ഡറിലാണ് 'റാശിദി'നെ ചന്ദ്രോപരിതലത്തില് എത്തിക്കുക.
ചന്ദ്രോപരിതലത്തില് നിന്ന് ലഭ്യമാക്കുന്ന വയര്ലെസ് കമ്മ്യൂണിക്കേഷന് സേവനങ്ങളിലൂടെ ദുബായിലെ മുഹമ്മദ് ബിന് റാശിദ് സ്പേസ് സെന്റര് എന്ജിനീയര്മാര് റോവറുമായി ബന്ധപ്പെടും. ഇതുവരെ ആരും കടന്നെത്തിയിട്ടില്ലാത്ത ചന്ദ്രന്റെ വടക്കുകിഴക്ക് ഭാഗത്ത് പര്യവേക്ഷണം നടത്താനാണ് റാശിദ് റോവര് ലക്ഷ്യമിടുന്നത്. ലെയ്ക്ക് ഓഫ് ഡ്രീംസ് എന്ന പേരില് അറിയപ്പെടുന്ന ചന്ദ്രന്റെ ഈ ഭാഗത്തിന് ചുവപ്പ് നിറം നല്കുന്നത് ബസാള്ട്ടിക് ലാവയാണ്. ഈ പ്രദേശത്തിന്റെ പ്രതലം, ഭൂമിശാസ്ത്രം, പൊടിപടലം, ഫോട്ടോ ഇലക്ട്രോണ് കവചം, ചന്ദ്രനിലെ ദിവസം എന്നിവ ദൗത്യത്തിലൂടെ പഠന വിധേയമാക്കും.
നവംബറില് വിക്ഷേപിക്കപ്പെടുന്ന പേടകം അഞ്ച് മാസം എടുത്ത് അടുത്ത മാര്ച്ചോടെയായിരിക്കും ചന്ദ്രനില് എത്തിച്ചേരുക എന്നാണ് കണക്കൂകൂട്ടല്. വലിയ തോതില് മാറിക്കൊണ്ടിരിക്കുന്ന ചന്ദ്രോപരിതലത്തിലെ ഊഷ്മാവിലുണ്ടാവുന്ന വ്യതിയാനമാണ് റോവര് നേരിടുന്ന ഏറ്റവും വലിയ വെല്ലുവിളി. മൈനസ് 200 ഡിഗ്രി വരെ താഴുന്ന താപനിലയെ പേടകം അതിജീവിക്കുമോ എന്നു കണ്ടറിയണം. അതുകൊണ്ടു തന്നെ രാത്രിയിലെ കൊടും തണുപ്പ് ബാധിക്കാതെ ഒരു ചാന്ദ്ര ദിനത്തിനകത്ത് ദൗത്യം പൂര്ത്തീകരിക്കുമെന്ന പ്രതീക്ഷയിലാണ് ശാസ്ത്രജ്ഞര്. ഭൂമിയിലെ 29 ദിവസങ്ങള്ക്ക് തുല്യമാണ് ഒരു ചാന്ദ്രദിനം.
21 ഇഞ്ച് വീതം നീളവും വീതിയുമുള്ള റാശിദ് റോവറില് രണ്ട് ഹൈ റെസല്യൂഷന് കാമറകള്, ഒരു തെര്മല് ഇമേജര്, ഒരു മൈക്രോസ്കോപിക് ഇമേജര് എന്നിവയാണ് ഘടിപ്പിച്ചിരിക്കുന്നത്. നാലു വീലുകളില് നീങ്ങുന്ന ഇത് സൂര്യപ്രകാശത്തില് നിന്നാണ് ഊര്ജം ശേഖരിക്കുന്നത്. ദൗത്യ കാലയളവില് ചന്ദ്രനുമായി ബന്ധപ്പെട്ട ആയിരക്കണക്കിന് ചിത്രങ്ങളും ഗവേഷണത്തിനാവശ്യമായ വിവരങ്ങള് റാശിദ് റോവര് നല്കുമെന്ന കണക്കുകൂട്ടലിലാണ് അധികൃതര്. ഇവ ചന്ദ്രനെ കുറിച്ചുള്ള കൂടുതല് പഠനങ്ങളിലേക്കും കണ്ടെത്തലുകളിലേക്കും ലോകത്തെ നയിക്കുമെന്നുമാണ് അധികൃതരുടെ കണക്കുകൂട്ടല്. നേരത്തേ ഹോപ്പ് പേടകം ചൊവ്വയിലെത്തിച്ച് ആദ്യമായി ചൊവ്വാ ദൗത്യം നടപ്പിലാക്കുന്ന അറബ് രാജ്യമായി യുഎഇ മാറിയിരുന്നു.