മധ്യപ്രദേശ് : ആശുപത്രികളിൽ ബാൻഡേജ് പോലും കിട്ടാത്ത വിധം മോശമാണ് മധ്യപ്രദേശിലെ ആരോഗ്യ സേവനം. ഭിന്ദ് ജില്ലയിൽ നിന്നാണ് മനസാക്ഷിയെ ഞെട്ടിക്കുന്ന വാർത്ത പുറത്തുവരുന്നത്. റോഡ് അപകടത്തിൽ പരുക്കേറ്റ യുവാവിന്റെ ഒടിഞ്ഞ കാലിൽ, പ്ലാസ്റ്റർ ഇടുന്നതിന് പകരം ഡോക്ടർമാർ കാർഡ്ബോർഡ് ചുറ്റികെട്ടി കെട്ടി. വേദന മാറാൻ മരുന്ന് നൽകാതെ മറ്റൊരു ആശുപത്രിയിലേക്ക് റഫർ ചെയ്തു. ഭിന്ദിലെ ആന്റിയൻ കാ പുരയിലുണ്ടായ വാഹനാപകടത്തിൽ ബൈക്ക് യാത്രികരായ രണ്ടുപേർക്ക് പരുക്കേറ്റതായാണ് വിവരം. ഇവരിൽ ഒരാളുടെ കാലിൽ പൊട്ടലുണ്ടായി. സ്ഥലത്തുണ്ടായിരുന്നവർ ഇയാളെ കമ്മ്യൂണിറ്റി ഹെൽത്ത് സെന്ററിൽ എത്തിച്ചു. എന്നാൽ പ്ലാസ്റ്റർ ഇടുന്നതിന് പകരം കാർഡ്ബോർഡ് കൊണ്ട് ബാൻഡേജ് കെട്ടി ജില്ലാ ആശുപത്രിയിലേക്ക് റഫർ ചെയ്താണ് ഡോക്ടർമാർ ചെയ്തത്. ജില്ലാ ആശുപത്രിയിലെത്തിയപ്പോൾ കാലിൽ നിന്ന് കാർഡ്ബോർഡ് ഊരിമാറ്റി റോ പ്ലാസ്റ്റർ പുരട്ടി. ഇരയുടെ ബന്ധു ഇതുമായി ബന്ധപ്പെട്ട വീഡിയോ സോഷ്യൽ മീഡിയയിൽ പങ്കുവച്ചതോടെയാണ് സംഭവം പുറത്തറിഞ്ഞത്. വീഡിയോ വൈറലായതോടെ വിശദീകരണവുമായി ആരോഗ്യവകുപ്പ് രംഗത്തെത്തി. പ്ലാസ്റ്റർ ഓഫ് പാരീസ് ലഭ്യമല്ലാത്തതിനാലാണ് കാർഡ്ബോർഡ് ഉപയോഗിച്ചതെന്നാണ് വിശദീകരണം. സംഭവത്തിൽ അന്വേഷണം വേണമെന്ന് സംസ്ഥാന വിദ്യാഭ്യാസ മന്ത്രി ആവശ്യപ്പെട്ടു.