പത്തനംതിട്ട: നരബലി കേസിൽ നിർണ്ണായക തെളിവുകൾക്കായി ഡമ്മിയുമായി വീണ്ടും അന്വേഷണ സംഘം. ഇരട്ട നരബലി കേസിൽ പ്രതികളായ മുഹമ്മദ് ഷാഫിയേയും ഭഗവൽ സിങ്ങിനെയും ഇലന്തൂരിലെ വീട്ടിലെത്തിച്ച് വീണ്ടും തെളിവെടുപ്പ് നടത്തി. മൃതദേഹങ്ങൾ പോസ്റ്റുമോർട്ടം നടത്തിയ ഡോക്ടർമ്മാരുടെ സാന്നിധ്യത്തിൽ ഡമ്മി പരീക്ഷണവും നടത്തി. ഇത് നാലാം തവണയാണ് കവന്ത്ര പോലീസ് പ്രതികളെ ഇവിടെ എത്തിച്ച് തെളിവെടുക്കുന്നത്.ഒരു മണിയോടെ പ്രതികളായ മുഹമ്മദ് ഷാഫി, ഭഗവൽ സിംഗ് എന്നിവരുമായി ഇലന്തൂരിലെത്തിയ അന്വേഷണ സംഘം പ്രഥാനമായും കൊലപാതകം പുനരാവിഷ്ക്കരിക്കുന്നതിനായാണ് ഡമ്മി ഉപയോഗിച്ചുള്ള തെളിവെടുപ്പ് നടത്തിയത്. കൊല്ലപ്പെട്ട സ്ത്രീകളുടെ പോസ്റ്റുമാർട്ടം നടത്തിയ കോട്ടയം മെഡിക്കൽ കോളേജിലെ ഡോക്ടർമാരും, ഫോറൻസിക്ക് വിദഗ്ധരും എറണാകുളം സിറ്റി പോലീസ് കമ്മീഷണറും അടക്കമുള്ളവർ കൊല നടന്ന വീട്ടിൽ എത്തിയിരുന്നു. പ്രതികളുടെ കസ്റ്റഡി കാലാവധി അവസാനിക്കുന്നതിന് മുൻപ് പരമാവധി ശാസ്ത്രീയ തെളിവുകൾ ശേഖരിക്കാനുള്ള ശ്രമത്തിലാണ് കടവന്ത്ര പോലീസ്. കൊല്ലപ്പെട്ട പത്മയെ ഇലന്തൂരിലെത്തിച്ച സംഭവമാണ് കഴിഞ്ഞ ദിവസം പുനരാവിഷ്ക്കരിച്ചത്. ചിറ്റൂർ റോഡിലെ കൃഷ്ണാ ഹോസ്പിറ്റലിൽ നിന്നും പത്മയെ കയറ്റി ഇലന്തൂരിലെത്തിച്ച സംഭവങ്ങൾ പുനരാവിഷ്ക്കരിച്ചിരുന്നു. റോസിലിനെ കൊലപ്പെടുത്താൻ ഉപയോഗിച്ച കയറിന്‍റെ കത്തിക്കരിഞ്ഞ ഭാഗങ്ങളും അന്വേഷണ സംഘം കണ്ടെത്തി.കൊലപാതകം നടത്തിയ രീതി പ്രതികൾ പോസ്റ്റുമോർട്ടം നടത്തിയ ഡോക്ടർമാർ അടക്കമുള്ളവരുടെ മുന്നിൽ ഡമ്മി ഉപയോഗിച്ച് വെള്ളിയാഴ്ച പുനരാവിഷ്ക്കരിച്ചു. പോലീസിൻ്റെ സഹായിയായി പ്രവർത്തിക്കുന്ന സോമൻ രണ്ടിടങ്ങളിൽ കുഴിയെടുക്കുകയും സെപ്ടിക് ടാങ്കിൻ്റെ മൂടി മാറ്റി പരിശോധന നടത്തുകയും ചെയ്തു. മരിച്ച സ്ത്രീകളുടെ വസ്ത്രങ്ങളും ബാഗും കത്തിച്ചതിൻ്റെ അവശിഷ്ടങ്ങളും ശാസ്ത്രീയ അന്വേഷണ സംഘം ശേഖരിച്ചിട്ടുണ്ട്. വൈകിട്ട് അഞ്ചോടെ വീട്ടിലെ തെളിവെടുപ്പ് പൂർത്തിയാക്കി. തുടർന്ന് വസ്തു പണയം വച്ച് വായ്പ എടുത്ത സർവ്വീസ് സഹകരണ ബാങ്കിലും പ്രതികളെ എത്തിച്ച് തെളിവെടുത്ത ശേഷമാണ് അന്വേഷണ സംഘം മടങ്ങിയത്. കടവന്ത്ര പോലീസ് പ്രധാനമായും പത്മയുടെ കൊലപാതകമാണ് അന്വേഷിക്കുന്നത്. പ്രതികളുടെ കസ്റ്റഡി കാലാവധി പൂർത്തിയാകുന്ന മുറക്ക് അലുവ പോലീസ് പ്രതികളെ കസ്റ്റഡിയിൽ വാങ്ങി റൊസിലിന്റെ കൊലപാതകം സംബന്ധിച്ച അന്വേഷണം ആരംഭിക്കുമെന്നാണ് അധികൃതർ പറയുന്നത്.