തിരുവനന്തപുരം: വെഞ്ഞാറമ്മൂട് വാഹനാപകടത്തിൽ അച്ഛന് പിന്നാലെ മകളും യാത്രയായി. ആംബുലൻസ് ബൈക്കിൽ ഇടിച്ചു കയറിയുണ്ടായ അപകടത്തിൽ പരുക്കേറ്റ് ചികിത്സയിലായിരുന്ന 4 വയസുകാരി അലംകൃതയും മരണത്തിന് കീഴടങ്ങി. അപകടത്തിൽ പോത്തൻകോട് സ്വദേശിയായ ഷിബുവിനും മകൾ അലംകൃതയ്ക്കും ഗുരുതരമായി പരുക്കേറ്റിരുന്നു. ഷിബുവിന് അപകടം നടന്ന ദിവസം തന്നെ ജീവൻ നഷ്ടമായിരുന്നു. ഗുരുതരമായി പരുക്കേറ്റ അലംകൃത ആശുപത്രിയിൽ ചികിത്സയിലായിരുന്നു. അലംകൃതയ്ക്ക് തലയ്ക്ക് ഗുരുതരമായി പരുക്കേറ്റിരുന്നു. ഇക്കഴിഞ്ഞ ശനിയാഴ്ചയാണ് ഇരുവരുടെയും മരണത്തിന് ഇടയാക്കിയ അപകടം നടന്നത്. വെഞ്ഞാറമ്മൂട് മുസ്ലിം പള്ളിക്ക് സമീപത്ത് വെച്ചാണ് ആംബുലൻസ് ബൈക്കിലേക്ക് ഇടിച്ചുകയറിയത്. രോഗിയെ ഇടുക്കിയിൽ രോഗിയെ ഇറക്കി മടങ്ങി വരുമ്പോഴായിരുന്നു അപകടം. അമിത വേഗതയിലായിരുന്ന ആംബുലൻസ് ബൈക്കിലേക്ക് ഇടിച്ചുകയറുകയായിരുന്നു. രാവിലെ കുഞ്ഞിന്‌റെ രക്തം പരിശോധിക്കാൻ എത്തിയതായിരുന്നു ഷിബു. ലാബ് തുറക്കുന്നതും കാത്ത് പുറത്ത് ബൈക്കിൽ ഇരിക്കുകയായിരുന്നു ഷിബുവും അലംകൃതയും. അപകടത്തിന് പിന്നാലെ ആശുപത്രിയിൽ എത്തിച്ചെങ്കിലും തലയ്ക്ക് ഗുരുതരമായി പരുക്കേറ്റ ഷിബു തൽസമയം മരിക്കുകയായിരുന്നു. അതേസമയം അപകടം ഉണ്ടായ സമയം ആംബുലൻസ് ഓടിച്ചിരുന്നത് മെയിൽ നഴ്‌സായിരുന്നു. ഇയാളെ പോലീസ് പിന്നീട് അറസ്റ്റ് ചെയ്തിരുന്നു. ആംബുലൻസ് ഡ്രൈവറുടെയും മെയിൽ നഴ്‌സിന്റെയും ലൈസൻസ് സസ്‌പെൻഡ് ചെയ്യാൻ നിർദ്ദേശം നൽകിയിട്ടുണ്ട്. ഉറക്കക്ഷീണം മൂലം ആംബുലൻസ് ഡ്രൈവർ വാഹനം കൈമാറുകയായിരുന്നുവെന്നായിരുന്നു വിശദീകരണം.