ഏറ്റുമാനൂര്‍: അമ്മയുടെ കൈവശം ഉണ്ടായിരുന്ന സ്വര്‍ണ്ണം മോഷ്ടിച്ച കേസില്‍ മൂത്തമകളും മരുമകനും അറസ്റ്റില്‍. ഇളയമകളുടെ വിവാഹാവശ്യത്തിനായി അമ്മ സൂക്ഷിച്ചിരുന്ന സ്വര്‍ണാഭരണങ്ങള്‍ കവര്‍ന്ന കേസിലാണ് അറസ്റ്റ്. തിരുവനന്തപുരം കരമന കുന്നിന്‍പുറംഭാഗത്ത് ടി സി 21/635 വീട്ടില്‍ കിരണ്‍രാജ് (26), ഭാര്യ ഐശ്വര്യ (22) എന്നിവരെയാണ് ഏറ്റുമാനൂര്‍ പോലീസ് അറസ്റ്റു ചെയ്തത്. കുടുംബവീടായ ഏറ്റുമാനൂരിലെ പേരൂരിലേക്ക് ഓണാവധിക്ക് എത്തിയപ്പോഴാണ് ഐശ്വര്യ അവിടെ അമ്മ സൂക്ഷിച്ചിരുന്ന സ്വര്‍ണം കവര്‍ന്നത്. അമ്മ ആ സമയത്ത് പാലക്കാട് ജോലിക്ക് പോയതായിരുന്നു. സ്വര്‍ണം തിരുവനന്തപുരത്തെ ഭര്‍തൃവീട്ടിലേക്ക് കൊണ്ടുപോകുകയും ചെയ്തു. പാലക്കാട് നിന്നു തിരികെയെത്തിയ അമ്മ, വീട്ടില്‍ സൂക്ഷിച്ചിരുന്ന 10 പവന്‍ സ്വര്‍ണം കാണാനില്ലെന്ന് ഏറ്റുമാനൂര്‍ സ്റ്റേഷനില്‍ പരാതി നല്‍കി. വീട്ടില്‍ ഉണ്ടായിരുന്നവരെ പോലീസ് ചോദ്യം ചെയ്തു. തന്റെ അച്ഛന്‍ സ്വര്‍ണം എടുക്കാന്‍ സാധ്യതയുണ്ടെന്ന് ഐശ്വര്യ പോലീസിനോട് പറഞ്ഞു. ഇതാണ് ഇവരെ സംശയിക്കാന്‍ കാരണം. അന്വേഷണസംഘത്തിന്റെ ശാസ്ത്രീയ പരിശോധനകള്‍ക്ക് ഒടുവില്‍, സ്വര്‍ണം മോഷ്ടിച്ചത് മകള്‍ തന്നെയാണെന്ന് കണ്ടെത്തി. ഭര്‍തൃവീട്ടില്‍ നിന്ന് 10 പവന്‍ സ്വര്‍ണം കണ്ടെടുത്തു. ഇതില്‍ അഞ്ച് പവന്‍ മുക്കുപണ്ടമായിരുന്നു. മോഷ്ടിച്ച സ്വര്‍ണത്തില്‍നിന്ന് അഞ്ചുപവന്‍ വരുന്ന മാല പണയംവെച്ചു. ഇതിന് പകരമായി അത്രയും മുക്കുപണ്ടവും ബോക്‌സില്‍ സൂക്ഷിക്കുകയായിരുന്നെന്ന് പോലീസിനോട് പറഞ്ഞു. പെണ്‍കുട്ടിയുടെ ഇളയ സഹോദരിയുടെ വിവാഹ ആവശ്യത്തിനായി അമ്മ കരുതിയിരുന്ന സ്വര്‍ണമാണ് മൂത്ത മകളായ ഐശ്വര്യ അപഹരിച്ചുകൊണ്ട് പോയത്. ഏറ്റുമാനൂര്‍ സ്റ്റേഷന്‍ എസ്എച്ച്ഒ രാജേഷ് കുമാര്‍, എസ്‌ഐ സ്റ്റാന്‍ലി, എഎസ് ഐ അംബിക, സിവില്‍ പോലീസ് ഓഫീസര്‍മാരായ സജി പിസി, സൈഫുദ്ദീന്‍, മനോജ് കെപി, സുഭാഷ് വാസു എന്നിവരും അന്വേഷണ സംഘത്തില്‍ ഉണ്ടായിരുന്നു. ഇരുവരെയും കോടതിയില്‍ ഹാജരാക്കി.