കട്ടപ്പന: കട്ടപ്പന ഗവൺമെന്റ് കോളേജിൽ കോളേജ് യൂണിയൻ ചെയർമാനെ സസ്പെൻഡ് ചെയ്തതിൽ പ്രതിഷേധിച്ച് എസ്എഫ്ഐയുടെ നേതൃത്വത്തിൽ പ്രിൻസിപ്പലിനെ മുറിയിൽ പൂട്ടിയിട്ട് പ്രതിഷേധിച്ചു. വൈകിട്ട് വരെ നീണ്ട സമരത്തിനൊടുവിൽ അനുനയ ചർച്ചയ്ക്ക് ശ്രമിച്ച പോലീസും വിദ്യാർത്ഥികളുമായി ഉന്തും തള്ളും വാക്കേറ്റവുമുണ്ടായി. ഒടുവിൽ എട്ടു ദിവസത്തേയ്ക്കുള്ള സസ്പെൻഷൻ മൂന്നു ദിവസം കുറച്ചു നൽകാമെന്ന ധാരണയിൽ തൽക്കാലത്തേയ്ക്ക് സമരം പിൻവലിച്ചു. കോളേജ് യൂണിയൻ ചെയർമാൻ ജിഷ്ണു കെ.ബിയടക്കം നാലു വിദ്യാർത്ഥികളെ സസ്പെൻഡ് ചെയ്തതിൽ പ്രതിഷേധിച്ചാണ് സമരം നടന്നത്. വെള്ളിയാഴ്‌ച വൈകിട്ട് ഗേൾസ് ഹോസ്റ്റലിൽ ആറു മണിക്ക് എത്തിയ രണ്ടു വിദ്യാർത്ഥിനികളെ താമസിച്ച് എത്തിയതിനാൽ കയറ്റാനാകില്ലെന്ന് വാർഡൻ നിലപാടെടുത്തു. ഇത് ചോദ്യം ചെയ്യാനെത്തിയ യൂണിയൻ ചെയർമാനും എസ്എഫ്ഐ അംഗമായ രഞ്ജിത്തുമായും വാർഡനും തമ്മിൽ വാക്കുതർക്കത്തിലേർപ്പെട്ടു. ഇതേ തുടർന്ന് ചെയർമാൻ വിഷ്ണുവിനേയും രഞ്ജിത്തിനേയും മറ്റ് രണ്ടു പേരെയും എട്ടു ദിവസത്തേക്ക് കോളേജ് പ്രിൻസിപ്പൾ പ്രൊഫ.വി.കണ്ണൻ സസ്പെൻറ് ചെയ്തതിൽ പ്രതിഷേധിച്ചാണ് എസ്. എഫ്.ഐയുടെ നേതൃത്വത്തിൽ പ്രിൻസിപ്പലിനെ മുറിയിൽ പൂട്ടിയിട്ട് സമരം ചെയ്തത്. പ്രതിഷേധ സമരം മണിക്കൂറുകളോളം നീണ്ടതോടെ കട്ടപ്പന പോലീസ് സ്ഥലത്തെത്തി സമരക്കാരുമായി ചർച്ചക്ക് ശ്രമിച്ചെങ്കിലും പരിഹാരമായില്ല. സസ്പെൻഷൻ പിൻവലിക്കണമെന്ന ആവശ്യത്തിൽ സമരക്കാർ ഉറച്ചു നിന്നു. സമരത്തെ തുടർന്ന് വിദ്യാർത്ഥികൾക്ക് തുടർന്ന് ഇന്ന് പഠനം മുടങ്ങി. ആദ്യഘട്ടത്തിൽ അധ്യാപക പ്രതിനിധികൾ പിടിഎ യോഗം സസ്പെൻഷൻ കാര്യത്തിൽ തീരുമാനം എടുക്കാം എന്നറിയിച്ചെങ്കിലും സമരക്കാർ ഇത് അംഗികരിച്ചില്ല. പിന്നീട് നടന്ന ചർച്ചയിലാണ് മൂന്നു ദിവസമായി വെട്ടിക്കുറച്ചത്.