തിരുവനന്തപുരം: പാലിന് ലിറ്ററിന് ആറുരൂപയിലധികം കൂട്ടിയേക്കും. ലിറ്ററിന് ഏഴുമുതൽ എട്ടുവരെ കൂട്ടണമെന്ന ശുപാർശയടങ്ങിയ ഇടക്കാല റിപ്പോർട്ട് മിൽമ നിയോഗിച്ച സമിതി ഞായറാഴ്ച നൽകി. വിലവർധന ചർച്ചചെയ്യാൻ പാലക്കാട് കല്ലേപ്പുള്ളിയിൽ തിങ്കളാഴ്ച മിൽമയുടെ അടിയന്തരയോഗം ചേരും. മൂന്നുയൂണിയനുകളിൽനിന്ന്‌ പ്രതിനിധികൾ യോഗത്തിനെത്തും. യോഗതിരുമാനം സർക്കാരിനെ അറിയിച്ചശേഷമാകും പുതിയ വില പ്രഖ്യാപിക്കുക.
ലിറ്ററിന് ഏഴുമുതൽ എട്ടുരൂപവരെ വർധിപ്പിക്കണമെന്ന കർഷകരുടെ ആവശ്യമെന്ന രീതിയിലാണ് സമിതി മിൽമയ്ക്ക് റിപ്പോർട്ട് നൽകിയത്. ഇങ്ങനെകൂട്ടിയാൽ മാത്രമേ കമ്മിഷനും മറ്റുംകഴിഞ്ഞ് ആറുരൂപയെങ്കിലും കർഷകന് ലഭിക്കൂ. കഴിഞ്ഞതവണ പാൽവില നാലുരൂപ കൂട്ടിയപ്പോഴും പ്രയോജനമുണ്ടായില്ലെന്നാണ് സമിതിയോട് കർഷകർ പരാതിപ്പെട്ടത്. കമ്മിഷൻ കഴിഞ്ഞ് മൂന്നുരൂപ 66 പൈസ മാത്രമേ കർഷകർക്ക് ലഭിച്ചുള്ളൂ.