തിരുവനന്തപുരം: പാറശാല ഷാരോൺ രാജ് കൊലപാതകത്തിൽ നിർണായകമായ വിഷക്കുപ്പി കണ്ടെടുത്തു. കേസിലെ പ്രതി ഗ്രീഷ്മയുടെ അമ്മാവൻ നിർമ്മലുമായി നടത്തിയെ തെളിവെടുപ്പിലാണ് ഷാരോണിനെ കൊല്ലാൻ ഉപയോഗിച്ച കളനാശിനിയുടെ കുപ്പി കണ്ടെത്തിയത്.
രാമവർമ്മൻചിറയ്ക്ക് സമീപം നടത്തിയ തെളിവെടുപ്പിലാണ് വിഷക്കുപ്പി ലഭിച്ചത്. ആളൊഴിഞ്ഞ സ്ഥലത്തെ കുളത്തിന് സമീപത്ത് നിന്ന് കാപിക്വ് കുപ്പിയാണ് കണ്ടെത്തിയത്. ഗ്രീഷ്മയുടെ വീട്ടിലെത്തുന്നതിനു മുൻപ് അമ്മാവൻ നിർമ്മലിനെ പോലീസ് വാഹനത്തിൽ നിന്ന് പുറത്തിറക്കിയാണ് ഇവിടെ പരിശോധന നടത്തിയത്. തുടർന്ന് കീടനാശിനിയുടെ കുപ്പി കണ്ടെത്തുകയായിരുന്നു. കേസിൽ നിർണായക തെളിവായി ഇത് മാറും. ഷാരോൺ രാജിനെ വിഷം കൊടുത്ത് കൊലപ്പെടുത്തിയ കേസിൽ പ്രധാന പ്രതി ഗ്രീഷ്മയുടെ അമ്മക്കും അമ്മാവനും പങ്കുണ്ടെന്ന് പോലീസ് നേരത്തെ വ്യക്തമാക്കിയിരുന്നു. തെളിവുകൾ നശിപ്പിച്ചതിനാണ് ഇരുവരെയും പ്രതി ചേർത്തത്. ഇതിന് പിന്നാലെ അമ്മാവനുമായി നടത്തിയ തെളിവെടുപ്പിലാണ് വിഷക്കുപ്പി കണ്ടെടുത്തത്. ഗ്രീഷ്മ ഒറ്റക്ക് കൊല നടത്തില്ലെന്ന് ഷാരോൺ രാജിന്‍റെ കുടുംബം ആദ്യം മുതൽ ആരോപിച്ചിരുന്നു. ഗ്രീഷ്മയുടെ അമ്മ സിന്ധു, അമ്മാവൻ നിർമൽകുമാർ എന്നിവർക്കെതിരെയായിരുന്നു ആരോപണം. ഇതിന് പിന്നാലെയാണ് ഇരുവരെയും തെളിവ് നശിപ്പിച്ചതിന് പ്രതി ചേർത്തത്. കൊലപാതകത്തിന് പിന്നാലെ ഗ്രീഷ്മയെ രക്ഷിക്കാൻ അമ്മയും അമ്മാവനും ശ്രമിച്ചുവെന്നാണ് കണ്ടെത്തൽ. ഇരുവരും ചേർന്ന് വിഷം ചേർത്ത കഷായത്തിന്‍റെ കുപ്പി നശിപ്പിച്ചുവെന്നും കണ്ടെത്തി.
