പാലാ : അധ്യാപക ജോലിക്കെന്ന വ്യാജേന യുവതിയെ ഒമാനിൽ എത്തിച്ച ഇടുക്കി സ്വദേശി പിടിയിൽ. ഇടുക്കി പെരുവന്താനം പാഴൂർക്കാവ് ചെറിയ കാവുങ്കൽ വീട്ടിൽ ചെല്ലപ്പൻ മകൻ മണിക്കുട്ടൻ എന്നു വിളിക്കുന്ന മനോജ് (39) ആണ് പാലാ പോലീസിൻ്റെ പിടിയിലായത്.പാലാ സ്വദേശിനിയായ യുവതിയെ 2022 ജനുവരിയിൽ ഒമാനിൽ അധ്യാപക ജോലി വാഗ്ദാനം ചെയ്ത് കൊണ്ടുപോകുകയും പറഞ്ഞ ജോലി നൽകാതെ നിർബന്ധിച്ച് വീട്ടുജോലിക്ക് അയക്കുകയും ചെയ്‌തു. യുവതിയെ തിരിച്ച് നാട്ടിലേക്ക് പോരാൻ സമ്മതിക്കാതെ അവിടെ തടഞ്ഞുവയ്ക്കുകയും ചെയ്തതിനെ തുടർന്ന് യുവതിയുടെ അമ്മ നൽകിയ പരാതിയിലാണ് മനോജിനെതിരെ പാലാ പോലീസ് മനുഷ്യക്കടത്തിന് കേസ് രജിസ്റ്റർ ചെയ്തത്. കേസിൽ അന്വേഷണം പുരോഗമിക്കുന്നതിനിടെ ഒന്നാം പ്രതിയായ മനോജ് ഒളിവിൽ പോയി. തുടർന്ന് ജില്ലാ പോലീസ് മേധാവി കെ കാർത്തികിൻ്റെ നിർദ്ദേശപ്രകാരം പ്രത്യേക അന്വേഷണ സംഘം രൂപീകരിക്കുകയും പ്രതിയെ അറസ്റ്റ് ചെയ്യുകയുമായിരുന്നു. പ്രതിയുടെ പേരിൽ കോട്ടയം, ഇടുക്കി, പത്തനംതിട്ട, തിരുവനന്തപുരം ജില്ലകളിൽ ആയി നിരവധി മോഷണക്കേസുകൾ ഉണ്ട്. കഴിഞ്ഞ ഒൻപത് വർഷമായി പാലാ ഇടപ്പാടിയിൽ ഉള്ള ഒരു വീട് വാടകയ്ക്ക് എടുത്ത് അയർക്കുന്നം സ്വദേശിയായ ഒരു സ്ത്രീയുടെ കൂടെ മനോജ് താമസിച്ച് വരികയാണ്. സോഷ്യൽ മീഡിയ വഴി സാമ്പത്തികമായി പിന്നാക്കം നിൽക്കുന്ന ആളുകൾക്ക് സൗജന്യമായി ജോലി സംഘടിപ്പിച്ച് കൊടുക്കാമെന്ന് പറഞ്ഞ് ഫോൺ നമ്പർ കരസ്ഥമാക്കിയ ശേഷം ഒറിജിനൽ ജോബ് വിസ ആണെന്നും നല്ല ജോലി ആണെന്നും പറഞ്ഞ് വിശ്വസിപ്പിച്ച് ഗൾഫിൽ വീട്ടുജോലിക്ക് എത്തിച്ച് അവരിൽ നിന്നും പ്രതിഫലം കൈപ്പറ്റുകയാണ് പ്രതികളുടെ രീതി എന്ന് പോലീസ് പറഞ്ഞു. ഓരോ ആളുകളുടെയും പേരിൽ പണം വാങ്ങി പ്രതികൾ മനുഷ്യക്കടത്ത് നടത്തി അമിതലാഭം ഉണ്ടാക്കുകയും ചെയ്യുന്നുവെന്നാണ് കേസ്. ഇവിടെ നിന്നും വിസിറ്റിങ്ങ് വിസയിൽ ആണ് ആളുകളെ കൊണ്ട് പോകുന്നത്. കേസിലെ രണ്ടാം പ്രതിയെ കഴിഞ്ഞ മാസം അറസ്റ്റ് ചെയ്ത് റിമാൻഡ് ചെയ്തിരുന്നു. കേസിലെ മറ്റു പ്രതികളെക്കുറിച്ചും ഇനിയും കൂടുതൽ ആളുകൾ ഇതിൽ ഉൾപ്പെട്ടിട്ടുണ്ടോ എന്നും പ്രത്യേക അന്വേഷണ സംഘം അന്വേഷിച്ചു വരികയാണെന്ന് പാലാ പോലീസ് സ്റ്റേഷൻ എസ്എച്ച്ഒ കെ.പി ടോംസൺ അറിയിച്ചു. സബ്ബ് ഇൻസ്പെക്ടർ ഷാജി സെബാസ്റ്റ്യൻ നടരാജൻ ചെട്ടിയാർ, സിവിൽ പോലീസ് ഓഫീസർമാരായ ജസ്റ്റിൻ ജോസഫ്, രഞ്ജിത്ത് സി, ജോഷി മാത്യു എന്നിവർ ചേർന്നാണ് പ്രതിയെ അറസ്റ്റ് ചെയ്തത്.