.jpeg)
കൊച്ചി: ആലുവ മുതൽ ഇടപ്പള്ളി വരെ കൊച്ചി മെട്രോയ്ക്ക് സമാന്തരമായി നടപ്പാതകൾ ആധുനികനിലനാരത്തിലേക്ക്. മെട്രോ സ്റ്റേഷനുകളിലേക്കും നഗരത്തിലെ പ്രധാന ഇടങ്ങളിലേക്കും യാത്രക്കാർക്ക് എളുപ്പത്തിൽ എത്തിച്ചേരാൻ കഴിയുന്ന തരത്തിലാണ് നടപ്പാതകൾ ഒരുക്കുന്നത്. നിലവിലുള്ള വൈദ്യുതി പോസ്റ്റുകൾ ഉൾപ്പെടെ നീക്കി മികച്ച നിലവാരത്തിലുള്ള ഫുട്പാത്തുകളാണ് റോഡിന് ഇരുവശവും സജ്ജീകരിക്കുക. കൊച്ചി മെട്രോയുടെ നോൺ-മോട്ടോറൈസ്ഡ് ഗതാഗത സംവിധാനത്തിൻ്റെ ഭാഗമാണ് പദ്ധതി. രണ്ട് സ്വകാര്യ കമ്പനികൾ അടങ്ങുന്ന കൺസോർഷ്യമാണ് കരാർ ഏറ്റെടുത്തിരിക്കുന്നത്.
സഭാരി ഇലക്ട്രിക്കൽസും ലീല ഇലക്ട്രിക് പവർ സർവീസസ് പ്രൈവറ്റ് ലിമിറ്റഡിന് എന്നീ കമ്പനികളാണ് നിർമാണ കരാർ ഏറ്റെടുത്തിരിക്കുന്നത്. 20.36 കോടി മൊത്തം നിർമ്മാണ ചെലവ് വരുന്ന പദ്ധതി ഒരു വർഷത്തിനുള്ളിൽ പൂർത്തിയാക്കുകയാണ് ലക്ഷ്യം. ഭിന്നശേഷിസൗഹൃദമായാണ് പദ്ധതി നടപ്പാക്കുന്നത്. മെട്രോ അടക്കമുള്ള പൊതുഗതാഗതസംവിധാനങ്ങൾ ഉപയോഗിക്കുന്നവ‍ർക്ക് വാഹനങ്ങളുടെ സഹായമില്ലാതെ നഗരത്തിൽ എവിടെയും സുഗമമായി എത്തിച്ചേരാൻ സഹായിക്കുക എന്നതാണ് നോൺ മോട്ടറൈസ്ഡ് പദ്ധതിയുടെ ഉദ്ദേശം. എട്ടുമാസംകൊണ്ട് ഇലക്ട്രിക്കൽ ജോലികളടക്കം നിർമാണം പൂർത്തിയാക്കുകയാണ് ലക്ഷ്യം.
ആധുനിക നടപ്പാതയുടെ നിർമാണവുമായി ബന്ധപ്പെട്ട് ആലുവ മുതൽ ഇടപ്പള്ളി വരെയുള്ള ഭാഗങ്ങളിലെ 190 വൈദ്യുതി തൂണുകൾ പൊളിച്ചു നീക്കും. 65 ട്രാൻസ്ഫോർമറുകളും നീക്കം ചെയ്യും. പകരം ഭൂഗർഭ കേബിളുകൾ സ്ഥാപിക്കും. ആധുനികവത്കരണത്തിൻ്റെ ഭാഗമായി മൂന്നര മീറ്റർ ദൂരത്തിൽ ലൈറ്റ് തൂണുകൾ സ്ഥാപിക്കും. ഇതുകൂടാതെ 700 എൽഇഡി സ്ട്രീറ്റ്ലൈറ്റുകളും സ്ഥാപിക്കുന്നുണ്ട്. പദ്ധതിയുടെ ഭാഗമായി കാൽനട യാത്രക്കാർക്ക് വിശ്രമിക്കാനായി ഇരിപ്പിടങ്ങളും വേസ്റ്റ് ബിന്നുകളും നടപ്പാതയിൽ ഒരുക്കുന്നുണ്ട്. കൂടാതെ, പാതയിലെ നിലവിലുള്ള പൊതുസ്ഥലങ്ങളും നവീകരിക്കും. ജോലികൾ സമയബന്ധിതമായി പൂർത്തീകരിക്കാൻ കെഎസ്ഇബിയും, കെഎംആർഎലുമായി സഹകരിച്ചാണ് പദ്ധതി മുന്നോട്ട് കൊണ്ടുപോവുക. നിർമാണം പൂർത്തിയാക്കി അഞ്ചുവർഷം പരിപാലിക്കാനുള്ള ചുമതലയും കരാർ കമ്പനിക്കാണ്.
നിലവിൽ കടവന്ത്ര മെട്രോ സ്റ്റേഷൻ മുതൽ തൃപ്പൂണിത്തുറ വരെയുള്ള മെട്രോ പാതയിൽ നോൺ-മോട്ടോറൈസ്ഡ് ട്രാൻസ്പോർട്ട് പദ്ധതിയുടെ ഭാഗമായുള്ള ആധുനി നടപ്പാതയുടെ നിർമ്മാണം അന്തിമഘട്ടത്തിലാണ്. എൻഎംടി പദ്ധതിയുടെ കീഴിൽ എല്ലാ മെട്രോ സ്റ്റേഷനുകളിലും ഇലക്ട്രിക് മൊബിലിറ്റിയും പാർക്കിങും ഒരുക്കുന്നുണ്ട്.