പത്തനംതിട്ട: ലോകത്തിലെ തന്നെ ഏറ്റവും വലിയ പന്തിഭോജനമായ ആറന്മുള അഷ്ടമിരോഹിണി സമൂഹസദ്യ പാർഥസാരഥി ക്ഷേത്ര മതിൽക്കകത്ത് ഇന്ന് നടക്കും (Vallasadya 2023). ഇതിനായുള്ള ഒരുക്കങ്ങൾ തിങ്കളാഴ്ച അടുപ്പിൽ അഗ്നിപകർന്നതോടെ ആരംഭിച്ചു. ഇത്തവണ വള്ളസദ്യ ഒരുക്കുന്നത് ചെറുകോൽ സോപാനം സികെ ഹരിശ്ചന്ദ്രനാണ്. പാചകം ചെയ്യുന്നവർ ഉൾപ്പെടെ 300 അംഗ സംഘമാണ് ഒപ്പമുള്ളത്.
ചേനപ്പാടി സംഘത്തിന് സ്വീകരണം
കാഞ്ഞിരപ്പള്ളി ചേനപ്പാടിയിൽനിന്ന് പാളത്തൈരുമായി എത്തിയ ഭക്തസംഘത്തിന് പാർഥസാരഥി ക്ഷേത്രത്തിൽ സ്വീകരണം നൽകി. പള്ളിയോട സേവാസംഘം പ്രസിഡന്റ് കെഎസ് രാജൻ, സെക്രട്ടറി പാർഥസാരഥി ആർ പിള്ള, ദേവസ്വം അഡ്മിനിസ്ട്രേറ്റീവ് ഓഫീസർ ജയകുമാർ എന്നിവരുടെ നേതൃത്വത്തിലാണ് സംഘത്തിന് സ്വീകരണം നൽകിയത്. ആഘോഷമായി എത്തിയ ഭക്തസംഘത്തെ കിഴക്കേ നടയിൽ വഞ്ചിപ്പാട്ടൊടെ സ്വീകരിച്ചു.
വാഴൂർ തീർഥപാദാശ്രമത്തിലെ ഗരുഡദ്ധ്വജാനന്ദ തീർഥപാദ സ്വാമി, പാർഥസാരഥി ഭക്തജന സമിതി പ്രസിഡന്റ് രാജപ്പൻ നായർ കോയിക്കലേത്ത്, സെക്രട്ടറി ജയകൃഷ്ണൻ കുറ്റിക്കാട്ട് എന്നിവരുടെ നേതൃത്വത്തിലാണ് തൈരുമായി എത്തിയത്. വള്ളസദ്യയ്ക്ക് ആവശ്യമായ 1500 ലിറ്റർ പാളത്തൈര് പരമ്പരാഗതമായി ചേനപ്പാടി കരക്കാരുടെ ചുമതലയിലാണ് ആറന്മുളയിൽ എത്തിച്ചുകൊടുക്കുന്നത്.
വാഴൂർ തീർഥപാദാശ്രമത്തിൽ നിന്നാണ് തൈര് സമാഹരിച്ച് ലഭിക്കുന്നത്. ഭക്തന്മാരുടെ വകയായി പാളകളിൽ ശുദ്ധമായ തൈര് തയ്യാറാക്കിയും സമർപ്പിച്ചു വരുന്നുണ്ട്. ചേനപ്പാടി കിഴക്കേക്കര ദേവീക്ഷേത്രത്തിൽനിന്നു രാവിലെ 10നു പുറപ്പെട്ടാണ് തിരുവാറന്മുളയിൽ നാമസങ്കീർത്തന ഘോഷയാത്രയായി തൈര് എത്തിച്ചു സമർപ്പിച്ചത്.
ജലഘോഷയാത്രക്ക് 51 പള്ളിയോടങ്ങൾ
പള്ളിയോട സേവാസംഘം പ്രസിഡൻ്റ് കെഎസ് രാജൻ അധ്യക്ഷത വഹിക്കുന്ന യോഗത്തിൽ തിരുവിതാംകൂർ ദേവസ്വം ബോർഡ് പ്രസിഡൻ്റ് കെ അനന്ത ഗോപൻ ഭദ്രദീപം കൊളുത്തി വള്ളസദ്യ ഉദ്ഘാടനം ചെയ്യും. ലോകത്തിലെ തന്നെ ഏറ്റവും വലിയ സദ്യയായ ആറന്മുള അഷ്ടമിരോഹിണി വള്ളസദ്യയിൽ 51 പള്ളിയോടങ്ങളും ഒരു ലക്ഷത്തിൽപരം ഭക്തജനങ്ങളും പങ്കെടുക്കും. പള്ളിയോട സേവാസംഘവും തിരുവിതാംകൂർ ദേവസ്വം ബോർഡും അഷ്ടമിരോഹിണി വള്ളസദ്യക്കായി വിപുലമായ സജ്ജീകരണങ്ങളാണ് ഒരുക്കുന്നത്.
കനത്ത സുരക്ഷ, നിയന്ത്രണങ്ങൾ ലംഘിക്കരുത്
ആറന്മുള പാർഥസാരഥി ക്ഷേത്രത്തിലെ അഷ്ടമിരോഹിണി വള്ളസദ്യയോട് അനുബന്ധിച്ച് ശ്രീകൃഷ്ണജയന്തി ദിനമായ സെപ്റ്റംബർ ആറിന് ശക്തമായ സുരക്ഷാക്രമീകരണങ്ങൾ ആറന്മുള പോലീസ് ഏർപ്പെടുത്തി. പത്തനംതിട്ട ഡിവൈഎസ്പി എസ് നന്ദകുമാറിന്റെ നേതൃത്വത്തിൽ 100 ഓളം പേരുടെ സുരക്ഷയാണ് ഈ വർഷം തയ്യാറാക്കിയിരിക്കുന്നത്. ക്ഷേത്രപരിസരത്ത് ഭക്തജനങ്ങളുടെ തിക്കും തിരക്കും ഒഴിവാക്കുന്നതിന് വേണ്ടി വാഹനഗതാഗതം നിയന്ത്രിക്കുന്നതാണ്.
ഗണപതി കോവിലിന് സമീപം വരെയും പഴയ പോലീസ് സ്റ്റേഷനു മുൻവശം വരെയും മാത്രമേ പൊതുജനങ്ങളുടെ വാഹനം കടത്തിവിടുകയുള്ളൂ. അമ്പലത്തിലേക്കുള്ള മറ്റു വഴികളിലും വാഹന ഗതാഗതം അനുവദിക്കുന്നതല്ല. പൊതുജനങ്ങൾക്ക് വാഹനം പാർക്ക് ചെയ്യുന്നതിനായി മൂന്ന് പാർക്കിങ് ഗ്രൗണ്ടുകൾ തയ്യാറാക്കിയിട്ടുണ്ട്. ആറന്മുള വിഎച്ച്എസ്എസ് ഗ്രൗണ്ട്, ആറന്മുള എൻജിനീയറിങ് കോളേജ് ഗ്രൗണ്ട്, എതിർവശത്തുള്ള വിജയാനന്ദ വിദ്യാപീഠം സ്കൂളിൻറെ ഗ്രൗണ്ട് എന്നിവയിൽ വാഹനം പാർക്ക് ചെയ്യുന്നതിനുള്ള സൗകര്യം ഏർപ്പെടുത്തിയിട്ടുണ്ട്.
ചെങ്ങന്നൂർ റോഡിൽ സത്രക്കടവ് മുതൽ ഐക്കര ജങ്ഷൻ വരെയും ഐക്കര ജങ്ഷൻ മുതൽ തറയിൽ ജങ്ഷൻ വരെയും റോഡ് അരികിൽ വാഹനം പാർക്ക് ചെയ്യാൻ അനുവദിക്കുന്നതല്ല. റോഡിൽ ഗതാഗത തടസ്സം ഉണ്ടാകുന്ന രീതിയിൽ പാർക്ക് ചെയ്യുന്ന വാഹനങ്ങൾക്കെതിരെ നിയമ നടപടികൾ സ്വീകരിക്കുന്നതാണ്. മാലമോഷണം പോലുള്ള കുറ്റകൃത്യങ്ങൾ ഒഴിവാക്കുന്നതിലേക്കായി മഫ്തിയിൽ പോലീസിനെ വിന്യസിച്ചിട്ടുണ്ട്. പമ്പയാറ്റിലൂടെ പള്ളിയോടങ്ങളിലെത്തുന്ന ഭക്തജനങ്ങൾക്ക് ആവശ്യമായ സുരക്ഷാ സംവിധാനങ്ങൾ പള്ളിയോടത്തിൽ സൂക്ഷിക്കേണ്ടതാണെന്നും ഇൻസ്‌പെക്ടർ സികെ മനോജ് അറിയിച്ചു.വിഷ രഹിത പച്ചക്കറിയുമായി കൃഷി വകുപ്പും വികസന സമിതിയും
അഷ്ടമിരോഹിണി വള്ളസദ്യയ്ക്ക് ആറന്മുള, തോട്ടപ്പുഴശ്ശേരി, മല്ലപ്പുഴശ്ശേരി, നാരങ്ങാനം എന്നീ കൃഷിഭവനുകളുടെയും കർഷകരുടെയും സഹകരണത്തോടെ ഏത്തക്ക, ചേന, പാവയ്ക്ക, വെള്ളരിക്ക, വെണ്ടയ്ക്ക, കറിവേപ്പില, കുമ്പളങ്ങ, മത്തങ്ങ, കൈതച്ചക്ക, പടവലങ്ങ എന്നിവ പള്ളിയോട സേവാസംഘത്തിന് നൽകി. ഏറ്റവും കൂടുതൽ ഭക്തജനങ്ങൾ പങ്കെടുക്കുന്ന അന്നദാന ചടങ്ങായ അഷ്ടമിരോഹിണി വള്ളസദ്യക്ക് നാട്ടിൽ തന്നെ വിളയിച്ച വിഷരഹിത പച്ചക്കറികൾ സമർപ്പിക്കുന്നതിന് ഭാഗമായാണ് ഇവ കൈമാറിയത്.
അഷ്ടമിരോഹിണി വള്ളസദ്യയുടെയും കാർഷിക സംസ്‌കൃതിയുടെയും പെരുമ കൂടുകയും കർഷകർക്ക് വരുമാനം വർധിക്കുകയും ചെയ്യുമെന്ന ഉദ്ദേശത്തോടെയാണ് ആറന്മുള വികസന സമിതിയും കൃഷിഭവനും പള്ളിയോട സേവാസംഘവും ചേർന്ന് ഈ പദ്ധതിക്ക് കഴിഞ്ഞവർഷം തുടക്കം കുറിച്ചത്. വരും വർഷങ്ങളിൽ അഷ്ടമിരോഹിണി വള്ളസദ്യയുൾപ്പെടെയുള്ള എല്ലാ വള്ളസദ്യകൾക്കും ഈ പ്രദേശങ്ങളിൽതന്നെ കൃഷിചെയ്ത പച്ചക്കറികൾ ലഭ്യമാക്കുന്നതിനാണ് പദ്ധതിയിൽ കൂടി ഉദ്ദേശിക്കുന്നത്.
വിവിധ കൃഷി ഭവനിൽനിന്നു കൊണ്ടുവന്ന പച്ചക്കറി ഉത്പന്നങ്ങൾ ഗ്രാമപഞ്ചായത്ത് പ്രസിഡന്റ് കെഎസ് ബിനോയിയും ആറന്മുള വികസന സമിതി പ്രസിഡന്റ് പിആർ രാധാകൃഷ്ണനും ചേർന്ന് പള്ളിയോട സേവാസംഘം വൈസ് പ്രസിഡന്റ് സുരേഷ് വെൺപാല, അഷ്ടമിരോഹിണി വള്ളസദ്യ കൺവീനർ കെജിഎസ് കർത്ത എന്നിവർക്ക് കൈമാറി.