.webp)
തിരുവനന്തപുരം: ഇസ്രായേൽ - ഹമാസ് യുദ്ധം രൂക്ഷമായിരിക്കെ ഇസ്രായേലിലുള്ള മലയാളികളുടെ സുരക്ഷ ഉറപ്പുവരുത്തണമെന്ന് മുഖ്യമന്ത്രി പിണറായി വിജയൻ. ഇസ്രായേലിലുള്ള മലയാളികളുടെ സുരക്ഷ ഉറപ്പുവരുത്തണമെന്ന് ആവശ്യപ്പെട്ട് വിദേശകാര്യ മന്ത്രി എസ് ജയശങ്കറിന്ന് മുഖ്യമന്ത്രി കത്തയച്ചു.ഏഴായിരത്തോളം മലയാളികൾ ഇസ്രായേലിലുണ്ടെന്നും ഇവരുടെ സുരക്ഷ ഉറപ്പുവരുത്തണമെന്നും ആവശ്യപ്പെട്ടാണ് മുഖ്യമന്ത്രി കത്തെഴുതിയത്. ഇസ്രായേലിലുള്ള മലയാളി കുടുംബങ്ങൾ ആശങ്കയിലാണ്. സാധ്യമാകുന്ന സാഹചര്യത്തിൽ എല്ലാവിധ സുരക്ഷയും ഉറപ്പാക്കണമെന്ന് മുഖ്യമന്ത്രി ആവശ്യപ്പെട്ടു.ഗാസയിലെ ഹമാസ് കേന്ദ്രങ്ങൾ ലക്ഷ്യമാക്കി ഇസ്രായേൽ ആക്രമണം തുടരുകയാണ്. ഇസ്രായേലിൽ തുടരുന്ന ഇന്ത്യക്കാരെ മടക്കിക്കൊണ്ടുവരുന്ന കാര്യത്തിൽ കേന്ദ്ര സർക്കാർ ഇതുവരെ നിലപാട് സ്വീകരിച്ചിട്ടില്ല. ഇന്ത്യൻ പൗരന്മാർക്ക് ഏതുസമയം ഇന്ത്യൻ എംബസിയുമായി ബന്ധപ്പെടാമെന്ന് വിദേശകാര്യ സഹമന്ത്രി വി മുരളീധരൻ കഴിഞ്ഞ ദിവസം വ്യക്തമാക്കിയിരുന്നു.