മറ്റക്കര: നൂറ്റാണ്ടുകള്‍ പഴക്കമുണ്ടെന്ന് കരുതപ്പെടുന്ന പറപ്പള്ളില്‍ കളരി പുനര്‍നിര്‍മാണത്തിനുശേഷം ദേവതകളെ കുടിയിരുത്തി. കുടുംബ കാരണവര്‍ സുകുമാരന്‍ കുഞ്ഞിയാണ് ദേവതകളെ കുടിയിരുത്തിയത്. പ്രധാന ദേവത ഭദ്രകാളിയാണ്. കൂടാതെ ഭൈരവന്‍, ഗുരുനാഥന്‍, ഗണപതി, ശാസ്താവ്, പരദേവത എന്നീ സങ്കല്‍പ്പങ്ങളുമുണ്ട്.
പറപ്പള്ളില്‍ കളരി ട്രസ്റ്റിന്റെ ചുമതലയിലാണ് പുനര്‍നിര്‍മാണ പ്രവര്‍ത്തനങ്ങള്‍ നടന്നത്. ആറന്മുള വാസ്തുവിദ്യ ഗുരുകുലമാണ് പുനര്‍ നിര്‍മിച്ച കളരിയുടെ രൂപരേഖ തയ്യാറാക്കിയത്. വെട്ടുകല്ലും മരവും തറയോടും മറ്റും ഉപയോഗിച്ച് തികച്ചും പരമ്പരാഗത രീതിയിലുള്ള വാസ്തുവിദ്യ ശൈലിയിലാണ് കളരി പുനര്‍ നിര്‍മിച്ചത്.
പഴയകാലത്ത് രാജാവിനെ സഹായിക്കുന്നതിനുള്ള പടയാളികളെ സജ്ജരാക്കുന്ന ആയുധ കളരിയായിരുന്നു പറപ്പള്ളില്‍ കളരി എന്ന് കരുതപ്പെടുന്നു. മറ്റക്കര കുറ്റിയാനിക്കല്‍ അയ്യന്‍ ഭട്ടര്‍ ശാസ്താക്ഷേത്രത്തിന് സമീപമാണ് കളരി നിലകൊള്ളുന്നത്. കളരിയില്‍ പരിശീലനം ആരംഭിക്കുന്നതിനു വേണ്ട നടപടികള്‍ കൈക്കൊള്ളുമെന്ന് ട്രസ്റ്റ് ഭാരവാഹികള്‍ അറിയിച്ചു.