യുകെ: യുകെയിലെ രക്ഷിതാക്കള്‍ സ്‌കൂള്‍ വിദ്യാര്‍ത്ഥികളായ മക്കളുടെ കാര്യത്തില്‍ കൂടുതല്‍ ജാഗ്രത പുലര്‍ത്തണമെന്നുമാണ് യുകെയിലെ ആന്റിഫ്രോഡ് ഏജന്‍സിയായ സിഫാസും ബാങ്കിംഗ് ട്രേഡ് ബോഡിയായ യുകെ ഫിനാന്‍സും മുന്നറിയിപ്പേകിയിരിക്കുന്നത്.
രാജ്യമാകമാനമുള്ള സ്‌കൂള്‍ വിദ്യാര്‍ത്ഥികളെ തട്ടിപ്പ് സംഘങ്ങള്‍ വന്‍ തോതില്‍ കള്ളപ്പണ കടത്തിന് ഉപയോഗിച്ച് ചൂഷണം ചെയ്യുന്നുവെന്ന റിപ്പോര്‍ട്ടുകള്‍ പുറത്ത് വന്ന സാഹചര്യത്തിലാണീ മുന്നറിയിപ്പ്.
ഇത്തരത്തില്‍ കുട്ടികളെ തട്ടിപ്പിലേക്ക് നയിക്കുന്നതിന് തട്ടിപ്പുകാര്‍ സോഷ്യല്‍ മീഡിയയെ ദുരുപയോഗിക്കുന്നത് തടയുന്നതിനും അത്തരക്കാരെ നിയമത്തിന്റെ മുന്നിലെത്തിക്കുന്നതിനുമായി സാങ്കേതിക വിദഗ്ധരുടെ സേവനം പ്രയോജനപ്പെടുത്തുന്ന പ്രക്രിയ അധികൃതര്‍ വര്‍ധിപ്പിച്ചിട്ടുണ്ട്. ഈ സാഹചര്യത്തില്‍ സോഷ്യല്‍ മീഡിയ കമ്പനികള്‍ ഇത്തരക്കാരെ കൈകാര്യം ചെയ്യുന്നതില്‍ കൂടുതല്‍ ജാഗ്രത പുലര്‍ത്തണമെന്ന ആവശ്യവും ശക്തമാകുന്നുണ്ട്.
ഇന്‍സ്റ്റാഗ്രാം , സ്‌നാപ് ചാറ്റ് തുടങ്ങിയ പ്ലാറ്റ്‌ഫോമുകളെ തട്ടിപ്പുകാര്‍ കുട്ടികളെ വലയിട്ട് പിടിക്കാനായി പ്രയോജനപ്പെടുത്തി വരുന്നുണ്ട്. പുതിയ അധ്യയന വര്‍ഷത്തോട് അനുബന്ധിച്ച് പകുതിയിലേറെ സ്റ്റുഡന്റ്‌സിനെ ഇത്തരം തട്ടിപ്പുകാര്‍ തട്ടിപ്പില്‍ ഭാഗഭാക്കാകുന്നതിനായി സമീപിച്ചുവെന്നാണ് ക്രൈം പ്രിവന്‍ഷന്‍ ഗ്രൂപ്പായ വി ഫൈറ്റ് ഫ്രോഡ് വെളിപ്പെടുത്തുന്നത്. ഈ തട്ടിപ്പിനായി ബാങ്ക് ഡീറ്റെയില്‍സ് വെളിപ്പെടുത്താന്‍ തയ്യാറാകുന്ന കുട്ടികള്‍ക്ക് ദിവസം തോറും 1000 പൗണ്ട് വരെ നല്‍കാന്‍ തയ്യാറുള്ള തട്ടിപ്പുകാരുമുണ്ടെന്നാണ് വെളിപ്പെട്ടിരിക്കുന്നത്.