തിരുവനന്തപുരം: വിഴിഞ്ഞം ലത്തീൻ പള്ളി ഇടവക വികാരിയുമായി മന്ത്രി സജി ചെറിയാൻ ചർച്ച നടത്തി. വിഴിഞ്ഞത്തെത്തിയ ആദ്യ കപ്പലിനെ ഔദ്യോഗികമായി സ്വീകരിക്കുന്നതുമായി ബന്ധപ്പെട്ട ചടങ്ങിലേക്ക് വികാരി മോൺസിംഗർ നിക്കോളാസ് അടക്കമുള്ളവരെ ഔദ്യോഗികമായി മന്ത്രി ക്ഷണിച്ചു. ലത്തീൻ സഭ ഉന്നയിച്ച ആവശ്യങ്ങൾ ഉടൻ പരിഗണിക്കാമെന്ന് മന്ത്രി വ്യക്തമാക്കി.
അതേസമയം, മന്ത്രി ചടങ്ങിലേക്ക് തങ്ങളെ ഔദ്യോഗികമായി ക്ഷണിച്ചുവെന്നും പങ്കെടുക്കണോയെന്ന കാര്യം ആലോചിച്ച് തീരുമാനിക്കുമെന്നും ഇടവക വികാരി മാധ്യമങ്ങളോട് പ്രതികരിച്ചു. മന്ത്രിയിൽ നിന്നും അനുകൂലമായ സമീപനമാണ് ഉണ്ടായത്. തങ്ങൾ വികസനത്തിന് എതിരല്ല. എന്നാൽ ജനത്തിന്റെ ആവശ്യം പരിഗണിക്കണം. മന്ത്രിയുമായി നടത്തിയ ചർച്ച ഫലപ്രദമായിരുന്നുവെന്നും അദ്ദേഹം പറഞ്ഞു.