കുടുംബ പ്രേക്ഷകര് ഏറ്റെടുത്ത നിരവധി ഹിറ്റ് പരമ്പരകളുടെ അമരക്കാരനായ സംവിധായകന് ആദിത്യന് അന്തരിച്ചു. ഹൃദയാഘാതത്തെ തുടര്ന്ന് തിരുവനന്തപുരത്ത് ആയിരുന്നു അന്ത്യം. സാന്ത്വനം, വാനമ്പാടി, ആകാശദൂത്, അമ്മ തുടങ്ങിയ ഹിറ്റ് സീരിയലുകളുടെ സംവിധായകനായിരുന്നു.
കൊല്ലം അഞ്ചൽ സ്വദേശിയാണ് ആദിത്യന്. ഏറെക്കാലമായി തിരുവനന്തപുരത്ത് പേയാട് ആയിരുന്നു താമസം. ജനറല് ആശുപത്രിയില് പോസ്റ്റ്മോര്ട്ടത്തിന് ശേഷം മൃതദേഹം ഭാരത് ഭവനില് പൊതുദര്ശനത്തിന് വെക്കും. സംസ്കാരം എവിടെവച്ചായിരിക്കുമെന്ന കാര്യത്തില് തീരുമാനം വരേണ്ടതുണ്ട്. തലസ്ഥാനത്തെ സിനിമാ, സീരിയല് പ്രവര്ത്തകര് മൃതദേഹം സൂക്ഷിച്ചിരിക്കുന്ന ആശുപത്രിയിലേക്ക് എത്തിക്കൊണ്ടിരിക്കുകയാണ്. പ്രേക്ഷകരുടെ പള്സ് നന്നായി അറിയാവുന്ന സംവിധായകനായിരുന്നു ആദിത്യന്.