പത്തനംതിട്ട: ജില്ലയിൽ പെയ്ത അതിശക്തമായ മഴയിൽ കനത്ത നാശം. നിരവധി വീടുകളിൽ വെള്ളം കയറി. ഒരാളെ ഒഴുക്കിൽപെട്ട് കാണാതായി. റോഡുകൾ പലതും വെള്ളത്തിനടിയിലാണ്. നാരങ്ങാനം പഞ്ചായത്തിൽ വലിയകുളത്തിന് സമീപം സുധി എന്ന സ്ത്രീയെയാണ് കുളിക്കാനിറങ്ങവെ പെട്ടെന്നുണ്ടായ വെള്ളപ്പാച്ചിലിൽ കാണാതായത്. ഇവർക്കായുള്ള തെരച്ചിൽ നാട്ടുകാരും പോലീസും ഫയർ ഫോഴ്സും ചേർന്ന് നടത്തുകയാണ്.നഗരത്തിലും ഇലന്തൂർ, നാരങ്ങാനം, ചെന്നീർക്കര, മല്ലപ്പുഴശ്ശേരി, കോഴഞ്ചേരി തുടങ്ങിയ പ്രദേശങ്ങളിലും അതിതീവ്ര മഴയാണ് പെയ്തത്. കുമ്പഴ തിരുവല്ല റോഡിൽ വെള്ളം കുത്തിയൊഴുകി ഗതാഗതം താത്ക്കാലികമായി തടസപ്പെട്ടു. വെട്ടിപ്രത്തിന് സമീപം പെരിങ്ങമലയിൽ മലവെള്ളപ്പാച്ചിൽ നിരവധി വീടുകളിൽ വെള്ളം കയറി. വ്യാപക കൃഷിനാശവും ഉണ്ടായിട്ടുണ്ട്. ഇലന്തൂർ പരിയാരം തുമ്പമൺതറ ഭാഗത്ത് തോട് കവിഞ്ഞൊഴുകി വീടുകളിൽ വെള്ളം കയറി. തുമ്പമൺതറ തേയില മണ്ണിൽ എസ്റ്റേറ്റിന് സമീപം മണ്ണിടിച്ചിൽ ഉണ്ടായി വൻ കൃഷി നാശവും ഉണ്ടായിട്ടുണ്ട്.