കൊച്ചി: ശിവരാത്രി ആഘോഷങ്ങൾക്കൊരുങ്ങി ആലുവ മണപ്പുറം. ശിവരാത്രിയോടനുബന്ധിച്ച് ഇന്ന് അർധരാത്രിയോടെ മഹാദേവക്ഷേത്രത്തിൽ പിതൃകർമങ്ങൾ ആരംഭിക്കും. ഉച്ചയോടെ തന്നെ ഭക്തർ ക്ഷേത്രത്തിലേക്ക് എത്തിത്തുടങ്ങും. വൈകീട്ടോടെ മണപ്പുറം ജനങ്ങളാൽ നിറയും. ഭക്തർക്ക് ക്ഷേത്രത്തിലേക്ക് എത്തിച്ചേരാനായി വിപുലമായ സൗകര്യങ്ങളാണ് ഒരുക്കിയിരിക്കുന്നത്. കെഎസ്ആർടിസി, കൊച്ചി മെട്രോ എന്നിവയും റെയിൽവേയും ഇന്നും നാളെയും പ്രത്യേക സർവീസുകൾ നടത്തും.
ഇന്ന് വൈകീട്ടത്തെ നിലമ്പൂർ - കോട്ടയം എക്സ്പ്രല് 16325 പതിവ് സ്റ്റോപ്പുകൾക്ക് പുറമെ മുള്ളൂർക്കര, ഒല്ലൂർ, നെല്ലായി, കൊരട്ടി എന്നിവിടങ്ങിൽ നിർത്തും. ഷൊർണൂർ - തൃശൂർ എക്സ്പ്രസ് (06461) ആലുവ വരെ സ്പെഷ്യൽ സർവീസ് നടത്തും. രാത്രി 11:15ന് തൃശൂർ വിടുന്ന ട്രെയിൻ എല്ലാ സ്റ്റേഷനിലും നിർത്തി അർധരാത്രി 12:45ന് ആലുവയിലെത്തും.
നാളെ രാവിലെ 5:15ന് ആലുവയിൽ നിന്ന് പുറപ്പെടുന്ന തൃശൂർ - കണ്ണൂർ (16609) എക്സ്പ്രസ് 6:45 ന് തൃശൂർ എത്തി കണ്ണൂരിലേക്ക് പതിവ് സർവീസ് നടത്തും. ആലുവ മുതൽ ഷൊർണ്ണൂർ വരെയുള്ള എല്ലാ സ്റ്റേഷനുകളിലും സ്റ്റോപ്പ് ഉണ്ടാകും.
കൊച്ചി മെട്രോ ഇന്ന് രാത്രിയും നാളെ രാവിലെയുമാണ് അധിക സർവീസുകൾ ഒരുക്കിയിരിക്കുന്നത്. ഇന്ന് രാത്രി 11:30 വരെ തൃപ്പൂണിത്തുറയിൽ നിന്നും ആലുവയിലേക്ക് മെട്രോ സർവീസ് ഉണ്ടാകും. രാത്രി 10:30ന് ശേഷം 30 മിനിറ്റ് ഇടവേളകളിലായിരിക്കും സർവീസ്. ശനിയാഴ്ച പുലർച്ചെ 4:30ന് മെട്രോ സർവീസ് ആരംഭിക്കും. 4:30 മുതൽ രാവിലെ 6 മണിവരെ 30 മിനിറ്റ് ഇടവിട്ടാണ് ട്രെയിൻ സർവീസ് ഉണ്ടാവുക.