യൂണിയൻ പബ്ലിക് സർവീസ് കമീഷനെതിരെ പൂജ ഖേദ്കർ ഹൈക്കോടതിയിൽ; നടപടികൾ പരിശോധിക്കാൻ ആവശ്യം

ന്യൂഡൽഹി: യൂണിയൻ പബ്ലിക് സർവീസ് കമീഷൻ (യു.പി.എസ്.സി) അയോഗ്യത പ്രഖ്യാപിച്ച വിവാദ ഐ.എ.എസ് ഓഫിസർ പൂജ ഖേദ്കർ കമീഷനെതിരെ ഹൈകോടതിയെ സമീപിച്ചു. ചട്ടം ലംഘിച്ച് സിവിൽ സർവീസസ് പരീക്ഷയെഴുതിയെന്ന് കണ്ടെത്തിയതിനെ തുടർന്നാണ് യു.പി.എസ്.സി പൂജക്കെതിരെ നടപടി എടുത്തത്. യു.പി.എസ്.സി പരീക്ഷകളിൽനിന്ന് ആജീവനാന്ത വിലക്കും ഏർപ്പെടുത്തിയിട്ടുണ്ട്. ഈ നടപടികൾ പരിശോധിക്കണമെന്ന് ആവശ്യപ്പെട്ടാണ് ചീഫ് ജസ്റ്റിസ് മൻമോഹൻ അടങ്ങിയ ബഞ്ചിനു മുമ്പാകെ പൂജ പരാതി നൽകിയത്. പരാതി ബുധനാഴ്ച പരിഗണിച്ചേക്കും.

ജൂലൈ 31നാണ് വ്യാജരേഖയുണ്ടാക്കി പരീക്ഷ എഴുതിയെന്ന് കണ്ടെത്തിയത്തിയതിനെ തുടർന്നാണ് പൂജയെ യു.പി.എസ്.സി അയോഗ്യയാക്കിയത്. ആരോപണത്തിൽ വിശദീകരണം നൽകാൻ 30ന് വൈകിട്ട് 3.30 വരെ പൂജക്ക് സമയം നൽകിയിരുന്നു. എന്നാൽ കാരണം കാണിക്കൽ നോട്ടീസിനോട് പ്രതികരിക്കാൻ അവർ തയാറായിരുന്നില്ല.

2022ൽ പരീക്ഷയെഴുതനായി വ്യാജ ഒ.ബി.സി, ഭിന്നശേഷി സർട്ടിഫിക്കറ്റുകൾ പൂജ സമർപ്പിച്ചതായാണ് കണ്ടെത്തൽ. അപേക്ഷയിൽ പേരും മാതാപിതാക്കളുടെ പേരും മാറ്റിയിരുന്നു. അനുവദനീയമായതിലും കൂടുതൽ തവണ പരീക്ഷ എഴുതാനാണ് ഇത്തരത്തിൽ ചെയ്തത്. ഇവർക്ക് ഐ.എ.എസ് ലഭിച്ചതും ഒ.ബി.സി, ഭിന്നശേഷി ആനുകൂല്യത്തിലാണ്. നേരത്തെ തട്ടിപ്പു നടത്തിയെന്ന കേസിൽ പൂജ നൽകിയ മുൻകൂർ ജാമ്യാപേക്ഷ കോടതി തള്ളിയിരുന്നു.