മുംബൈയില്‍ നാല് ജൂവലറികളുടെ ഉടമയായ മഹീന്ദ്ര ഹശ്ബാ യാദവിനെ (53)യാണ് കേരളാ പോലിസ് അതിസാഹസികമായി മുംബൈ മുളുണ്ടില്‍നിന്നു പിടികൂടിയത്. ആഡംബര ബംഗ്ലാവില്‍ താമസിക്കുന്ന മോഷ്ടാവിനെ ഇയാളുടെ തന്നെ ഗുണ്ടാസംഘത്തിന്റെ ഭീഷണി മറികടന്നാണ് സാഹസികമായി അറസ്റ്റ് ചെയ്തത്. പ്രതിയെ പോലിസ് മൂവാറ്റുപുഴയിലെത്തിച്ചു.
2006ല്‍ മൂവാറ്റുപുഴ കല്ലറയ്ക്കല്‍ ജ്വല്ലറിയില്‍ നടന്ന 30 പവന്‍ മോഷണക്കേസിലെ പ്രതിയാണ് മഹീന്ദ്ര ഹശ്ബാ. കടയിലെ സ്വര്‍ണപ്പണിക്കാരനായിരുന്ന ഇയാള്‍ 30 പവന്‍ സ്വര്‍ണവുമായി കുടുംബസമേതം നാടുവിടുക ആയിരുന്നു. കല്ലറയ്ക്കല്‍ ജ്വല്ലറിയിലെ വിശ്വസ്തനായ സ്വര്‍ണപ്പണിക്കാരനായിരുന്നു മഹീന്ദ്ര യാദവ്. 15 വര്‍ഷത്തോളം കുടുംബസമേതം മൂവാറ്റുപുഴയിലായിരുന്നു താമസം. ആ സമയം ഇയാള്‍ പതിവായി ജ്വല്ലറിയില്‍നിന്നു ശുദ്ധി ചെയ്യാനായി സ്വര്‍ണം കൊണ്ടുപോയിരുന്നു. 2006ല്‍ 30 പവനുമായി പോയശേഷം തിരികെയെത്തിയില്ല.
18 വര്‍ഷം മുന്‍പു 30 പവനുമായി മുങ്ങിയ യാദവ് ചെറിയതോതില്‍ സ്വര്‍ണ ബിസിനസ് തുടങ്ങി.് പൊലീസ് കണ്ടെത്തുമ്ബോഴേക്കും നാല് ജ്വല്ലറികളുടെ ഉടമയായിക്കഴിഞ്ഞിരുന്നു. മുമുണ്ടിലെ ചെറിയ ഡോണ്‍ ആയി മാറി. ഇയാളെ തിരഞ്ഞെത്തിയ കേരളാ പോലിസിന് ഇയാളുടെ ഗുണ്ടകളുടെ ഭീഷണിയും ഉണ്ടായി. കസ്റ്റഡിയിലെടുത്തശേഷം ഇയാളുടെ ഗുണ്ടാസംഘത്തെ വെട്ടിച്ചു പലവഴികളിലൂടെ പുണെ വിമാനത്താവളത്തിലെത്തിയാണു പൊലീസ് നാട്ടിലേക്കു മടങ്ങിയത്. കോടതിയില്‍ ഹാജരാക്കിയ യാദവിനെ 14 ദിവസത്തേക്കു റിമാന്‍ഡ് ചെയ്തു.