തൃശ്ശൂർ :ഒരുമാസത്തെ ശമ്പളത്തിലേറെയും ചെലവാക്കി 40 ടിക്കറ്റുകളാണ് രമേഷ് എടുത്തത്. ഭാഗ്യ ദേവതയുടെ അനുഗ്രഹം കാത്തിരിക്കുകയാണെങ്കിലും ദൗര്‍ഭാഗ്യത്തിന്റെ കണക്ക് പുസ്തകത്തില്‍ ഒന്നാം സ്ഥാനത്താണ് ഈ മനുഷ്യന്‍.
55 ലക്ഷത്തോളം രൂപയുടെ കടബാധ്യതയ്ക്കു നടുവിലാണ് പുത്തൂര്‍ പൗണ്ട് റോഡ് കരുവാന്‍ രമേഷിന്റെ ജീവിതം. ഇതില്‍ നിന്നും രക്ഷപ്പെടാനുള്ള മാര്‍ഗമായാണ് 20,000 രൂപ മുടക്കി 40 ഓണം ബംബര്‍ ടിക്കറ്റുകള്‍ എടുത്തത്. എന്നാല്‍ രമേഷ് വാങ്ങിയ ടിക്കറ്റുകള്‍ എല്ലാം മോഷണം പോയി. രമേഷിന്റെ പരാതിയില്‍ പൊലീസ് അന്വേഷണം തുടങ്ങി. ബന്ധുക്കളുമായി സ്വത്തു തര്‍ക്കമുള്ള രമേഷ് ഒറ്റയ്ക്കാണു താമസിക്കുന്നത്. ലോട്ടറിയടിച്ചാല്‍ കടം വീട്ടാമെന്ന പ്രതീക്ഷയിലാണു ടിക്കറ്റുകള്‍ വാങ്ങിയത്.
25 കോടി രൂപ ഒന്നാം സമ്മാനമുള്ള ഓണം ബംപറിന്റെ നറുക്കെടുപ്പ് ഇന്നാണ്. മോഷ്ടിക്കപ്പെട്ട ടിക്കറ്റുകള്‍ കണ്ടുകിട്ടിയില്ലെങ്കിലോ എന്നു ഭയന്നു രമേഷ് കഴിഞ്ഞ ദിവസം 10 ടിക്കറ്റുകള്‍ കൂടി വാങ്ങിവച്ചിട്ടുണ്ട്.