മുംബൈ: പതിവ് പരിശോധനയ്‌ക്കായി ആശുപത്രിയിലെത്തിയ രത്തൻ ടാറ്റയുടെ ആരോഗ്യനില ഗുരുതരമെന്ന് റിപ്പോർട്ട്. അന്താരാഷ്‌ട്ര മാദ്ധ്യമമായ റോയിട്ടേഴ്സാണ് ഇതുസംബന്ധിച്ച വാർത്ത റിപ്പോർട്ട് ചെയ്തിരിക്കുന്നത്. അടുത്ത വൃത്തങ്ങളെ ഉദ്ധരിച്ചാണ് റിപ്പോർട്ട്. മുംബൈയിലെ ആശുപത്രിയിൽ ഐസിയുവിലാണ് രത്തൻ ടാറ്റയുള്ളതെന്ന് റോയിട്ടേഴ്സ് റിപ്പോർട്ട് ചെയ്യുന്നു.
86-കാരനായ വ്യവസായ ഭീമൻ, വാർദ്ധക്യ സഹജമായ അസ്വസ്ഥതകളെ തുടർന്നായിരുന്നു ആശുപത്രിയിൽ ചികിത്സ തേടിയത്. ഇതോടെ രത്തൻ ടാറ്റയുടെ ആരോഗ്യനില സംബന്ധിച്ച് നിരവധി അഭ്യൂഹങ്ങൾ ഉയർന്നിരുന്നു. എന്നാൽ പൊതുജനം പരിഭ്രമിക്കേണ്ടതില്ലെന്നും തനിക്ക് അസുഖമൊന്നുമില്ലെന്നും രത്തൻ ടാറ്റ തന്നെ വിശദീകരണം നൽകി. തെറ്റായ വാർത്തകൾ പ്രചരിപ്പിക്കരുതെന്നും അദ്ദേഹം പറഞ്ഞു. ഇതിന് പിന്നാലെയാണ് റോയിട്ടേഴ്സ് റിപ്പോർട്ട് വരുന്നത്. അതേസമയം ഇക്കാര്യത്തിൽ ഔദ്യോഗിക പ്രതികരണം നടത്താൻ രത്തൻ ടാറ്റയുടെ അടുത്ത വൃത്തങ്ങൾ തയ്യാറായിട്ടില്ല.