ദോഹ ഖത്തറിലെ പ്രമുഖ മലയാളി
വ്യവസായിയും ജീവകാരുണ്യ പ്രവർത്തകനും കലാ-സാമൂഹിക മേഖലയിലെ നിറ സാന്നിധ്യവുമായ കെ. മുഹമ്മദ് ഈസ (68) അന്തരിച്ചു. ന്യൂമോണിയ ബാധിതനായി ചികിത്സയിലിരിക്കെ ഇന്ന് പുലർച്ചെ ഹമദ് മെഡിക്കൽ കോർപറേഷൻ ആശുപത്രിയിലായിരുന്നു മരണം.
ഫുട്ബോൾ സംഘാടകനും മാപ്പിളപ്പാട്ട് ഗായകനും ആസ്വാദകനുമെന്ന നിലയിൽ നാലു പതിറ്റാണ്ടിലേറെ ഖത്തറിലെയും കേരളത്തിലെയും കലാകായിക രംഗത്തെ സജീവ സാന്നിധ്യമായി നിറഞ്ഞു നിന്നാണ് വിടവാങ്ങൽ.
1976ൽ തൻറെ 19-ാം വയസ്സിൽ കപ്പൽ കയറി ഖത്തറിലെത്തി. നിരവധി കലാകാരന്മാരെ ദോഹയിൽ എത്തിക്കുന്നതിനും അവർക്ക് വേദിയൊരുക്കുന്നതിലും മുൻപന്തിയിൽ ഉണ്ടായിരുന്ന മുഹമ്മദ്., അവശരായ കലാകാരന്മാരെ കണ്ടെത്തുന്നതിനും അവർക്ക് സാമ്പത്തിക സഹായം ഉൾപ്പെടെ നൽകുന്നതിനും മുന്നിൽ ആയിരുന്നു. ഖത്തറിലെ ഏറ്റവും വലിയ ഫുട്ബോൾ കൂട്ടായ്മയായ ഖിഫിന്റെ വൈസ് പ്രസിഡന്റ് കൂടിയായ കെ മുഹമ്മദ് ഒരു മികച്ച സ്പോർട്സ് പ്രേമി കൂടിയായിരുന്നു. കുടുംബസമേതം പതിറ്റാണ്ടുകളായി ഖത്തറിലാണ് താമസം.