കണ്ണൂർ: ഇരിട്ടി ആയിരക്കളത്ത് സ്ഫോടക വസ്തു പൊട്ടിത്തെറിച്ച് ഒരാൾ‌ക്ക് പരുക്ക്. തൊഴിലുറപ്പ് തൊഴിലാളി ആയിരക്കളം സ്വദേശി രോഹിണിക്കാണ് പരുക്കേറ്റത്. മുഖത്തും നെഞ്ചിലും കാലിനും പരുക്കേറ്റ രോഹിണിയെ പരിയാരം മെഡിക്കൽ കോളെജിൽ പ്രവേശിപ്പിച്ചു. പരുക്ക് ഗുരുതരമല്ലെന്നാണ് വിവരം. വെള്ളിയാഴ്ച ഉച്ചയ്ക്കുശേഷം 3.45ഓടെ തൊഴിലുറപ്പ് തൊഴിലാളികള്‍ തോട് വൃത്തിയാക്കുന്നതിനിടെയാണ് സംഭവം.
തോട്ടിലുണ്ടായിരുന്ന ചാക്ക്കെട്ട് കത്തി ഉപയോഗിച്ച് വലിച്ചെടുത്ത് മാറ്റാൻ ശ്രമിക്കുന്നതിനിടെയാണ് പൊട്ടിത്തെറിച്ചത്. ചാക്കിലുണ്ടായിരുന്ന പന്നിപ്പടക്കമാകാം എന്ന് പൊലീസ് പറയുന്നു. കൃഷിയിടത്ത് വന്യമൃഗങ്ങൾ ഇറങ്ങുന്ന സ്ഥലമായതിനാൽ ഇവിടെ പന്നിപ്പടക്കം ഉപയോഗിക്കാറുണ്ടാകാമെന്നാണ് സംശയിക്കുന്നതെന്നും പൊട്ടാതെ കിടന്ന രണ്ട് പന്നിപ്പടക്കം കസ്റ്റഡിയിൽ എടുത്തതായും പൊലീസ് അറിയിച്ചു.